Tags-Raat

maut ne saarī raat hamārī nabz TaTolī
aisā marne kā māhaul banāyā ham ne

koī ġhamgīñ koī ḳhush ho kar sadā detā rahā
raat shahr-e-dil kā har manzar sadā detā rahā

mere karb-e-tishnagī par raat shīshe ro paḌe
ḳhushk hoñToñ ko mire sāġhar sadā detā rahā

raat bhar meñ sham-e-mahfil jal-bujhī
āshiqoñ kā dil jalānā aur hai

raat meñ dil ko kyā sūjhī hai us ke gaañv ko chalne kī
jañgal meñ chīte rahte haiñ raah meñ naddī naale haiñ

ek din vo zarroñ ko āftāb kar leñge
dhuup ke jo ḳhvāhāñ haiñ raat ke añdhere meñ

raat kitnī bojhal hai kis qadar añdherā hai
dil gavāhī detā hai paas hī saverā hai

pahāḌ jaise dinoñ ko to kaaT luuñ lekin
nikal na pā.ūñ maiñ ik raat kī girānī se

raat to kaalī thī lekin raat guzar kar sub.h jo aa.ī
aur ghaTe kam-tāb ujāle aur baḌhe zulmāt ke saa.e

'saudā' tirī fariyād se āñkhoñ meñ kaTī raat
aa.ī hai sahar hone ko tuk tū kahīñ mar bhī

bo.e 'mīnā' raat ke khetoñ meñ yuuñ sūraj ke biij
apnī koshish hai jahāñ meñ raushnī qaa.em rahe

vo raat raat kā mehmāñ to umr bhar ke liye
chalā gayā mujhe yādoñ kā silsila de kar

raat ke añdheroñ se jañg karne vāloñ ne
sub.h kī hathelī par āftāb rakhnā hai

raat chupke se le uḌī thī havā
raaz dil kā batā diyā hogā

maiñ gunāhoñ kā taraf-dār nahīñ huuñ phir bhī
raat ko din kī nigāhoñ se na dekhā jaa.e

'sāz' mirī jānib uThtī hai raat ga.e añgusht-e-''alast''
ruuh meñ ik bhūlā-bisrā paimān ubhartā aatā hai

sub.h hai raat kahāñ ab vo kahāñ raat kī baat
baat hī baat to hai baiTh bhī lo baat kī baat

raat ka.abe meñ ga.ī qulqul-e-mīnā ban kar
na to chhuptī hai na dabtī hai ḳharābāt kī baat

koste haiñ vo burī tarah jo kahtā huuñ 'riyāz'
rāt-bhar aaj bhī hotī rahī kal raat kī baat

āsmāñ par udaas baiThā chāñd
rāt-bhar taare gintā rahtā hai