Tags-Raat

raat bhar suunī rahī birhan kī sej
aur āñgan meñ diyā jaltā rahā

roz ik ḳhvāb-e-musalsal aur maiñ
raat bhar yādoñ kā jañgal aur maiñ

shaam paḌe so jaane vālā! diip bujhā kar yādoñ ke
raat ga.e tak jaag rahā thā pahlī pahlī bārish meñ

kal raat mirā beTā mire ghar
chehre pe munḌhe ḳhākī kapḌā

kal raat jo īñdhan ke liye kaT ke girā hai
chiḌiyoñ ko baḌā pyaar thā us būḌhe shajar se

ik vāda-e-fardā kī ummīd pe zinda huuñ
ai kaash kisī sūrat ye raat guzar jaa.e

maiñ tire jism ke jab paar nikal jā.ūñgā
vasl kī raat baḌī ġhaur-talab hogī vo

ye karb-o-dard hī dar-asl hai darkār jiine meñ
so in ko chāhiye din-rāt palkoñ pe sajā rakhnā

raat hai jashn mirī ruuh kī āzādī kā
sub.h phir jism ke zindān meñ aa jaatā huuñ

ye na pūchh kaise basar kiye shab-o-roz kitne pahar jiye
kise rāt-din kī tamīz thī kise yaad itne hisāb haiñ

shaam tamhīd-e-ġhazal raat hai takmīl-e-ġhazal
din nikalte hī nikal jaatī hai jaañ ham-nafaso

tirī nigāh banī aa.ina mirī ḳhātir
maiñ ḳhud ko dekh ke kal raat muskurāne lagā

hamāre ḳhvāb to shahroñ kī saḌkoñ par bhaTakte the
tumhārī yaad thī jo raat bhar bistar pe rakkhī thī

tum ne dekhī hai kabhī ek zan-e-ḳhāna-ba-dosh
jis ke ḳheme se pare raat kī tārīkī meñ

aas kī lau āñkhoñ meñ jalā.e laḌtī jā.ūñ añdheroñ se
raat hai raat kā ho na saverā tum hī kaho kyā mumkin hai

tere vaade ko kabhī jhuuT nahīñ samjhūñgā
aaj kī raat bhī darvāza khulā rakkhūñgā

guzreñ jo mere ghar se to ruk jaa.eñ sitāre
is tarah mirī raat ko chamkāo kisī din

maiñ apnī har ik saañs usī raat ko de duuñ
sar rakh ke mire siine pe so jaao kisī din

raat hī ke dāman meñ chāñd bhī haiñ taare bhī
raat hī kī qismat hai be-charāġh honā bhī

kohar kohsār raat terā saath
chāñd niklā nayā nayā kaisā