Tags-Raat

thī zindagī mirī rāhoñ ke pech-o-ḳham kī asiir
magar maiñ raat ke hamrāh apne ghar bhī gayā

din añdheroñ kī talab meñ guzrā
raat ko sham.a jalā dī ham ne

firāq-rāt meñ zinda rahe ki zinda thī
hamārī ruuh meñ sarshāri-e-visāl-e-qadīm

ālam-e-nisvāñ pe kaalī raat jab chhā jā.egī
ye tire māthe kī biñdī sub.h ko sharmā.egī

sau tarah se ḳhud ko bahlā kar ham jis ko bhulā.e baiThe the
kal raat achānak jaane kyuuñ vo ham ko musalsal yaad aayā

mujhe kisī ne batāyā hai aap ke ye dost
hamesha raat ga.e apne ghar ko aate haiñ

raat gahrī hai magar ek sahārā hai mujhe
ye mirī aañkh kā aañsū hī sitārā hai mujhe

ye raat judā.ī kī bahut raushan hai
phailā huā yādoñ kā abhī dāman hai

kahte kahte ġham kā fasāna
kaTtī raat saverā hotā

bahut hasīñ raat hai magar tum to so rahe ho
nikal ke kamre se ik nazar chāñdnī to dekho

fuġhāñ kartā hī rahtā hai ye din raat
ilāhī dil hai merā yā jaras hai

raat sannāTe kī chādar meñ paḌī hai lipTī
pattiyāñ saḌkoñ kī sab jaag rahī haiñ jaise

gūñjtā hai nāla-e-mahtāb aadhī raat ko
TuuT jaate haiñ suhāne ḳhvāb aadhī raat ko

bhāgte sāyoñ kī chīḳheñ TūTte tāroñ kā shor
maiñ huuñ aur ik mahshar-e-be-ḳhvāb aadhī raat ko

shaam hī se bazm-e-anjum nashsha-e-ġhaflat meñ thī
chāñd ne bhī pī liyā zahrāb aadhī raat ko

ik shikasta ḳhvāb kī kaḌiyāñ milāne aa.e haiñ
der se bichhḌe hue ahbāb aadhī raat ko

daulat-e-ehsās-e-ġham kī itnī arzānī huī
niiñd sī shai ho ga.ī nāyāb aadhī raat ko

hazār talḳh sahī phir bhī ḳhush-navā hai bahut
kisī charāġh kā lahja siyāh raat ke saath

jo saare din kī thakan oḌh kar maiñ sotā huuñ
to saarī raat mirā ghar safar meñ rahtā hai

kahā thā shaam se pahle hī lauT aa.egā
hameñ ḳhayāl rahā raat bhar nahīñ aayā