Tags-Raat

bahut bechain huuñ niiñd aa rahī hai raat jaatī hai
ḳhudā ke vāste jald ab karo tadbīr sone kī

ik raat maiñ so nahīñ sakā thā
aur ḳhvāb bhī dekhnā paḌā thā

raat ke surma.ī añdheroñ meñ
saañs lete hue saveroñ meñ

be-yār sar-e-shām se hai jaan pe naubat
allāh abhī chaar pahar raat paḌī hai

som-ras maiñ ne piyā
raat din raqs kiyā

dard itnā thā ki us raat dil-e-vahshī ne
har rag-e-jāñ se ulajhnā chāhā

chhīn kar ḳhvāb mire merī talab pūchhte haiñ
raat bhar niiñd na aane kā sabab pūchhte haiñ

chashm-e-ḳhūñ-basta se kal raat lahū phir Tapkā
ham ne jaanā thā ki bas ab to ye nāsūr gayā

nāla-e-'mīr' nahīñ raat se sunte ham log
kyā tire kūche se ai shoḳh vo ranjūr gayā

furqat meñ kyā batā.ūñ ki din hai ki raat hai
āñkhoñ ko sūjhtā nahīñ rone ke dhyān meñ

bayāz-e-mehr nigal kar bhī raat raat rahī
siyāhkār kā chehra siyāh-fām rahā

pās-e-rusvā.ī se dekho paas aa sakte nahīñ
raat aa.ī niiñd kā tum ko bahāna ho gayā

tū kahāñ hai ḳhabar nahīñ ai dost
raat din terī guftugū hai yahāñ

yahī hai mudda.ā apnā yahī hai iltijā apnī
vatan meñ rāt-din yārab masarrat ho masarrat ho

kis qadar be-misāl sapnā thā
chain se kaT ga.ī hai raat mirī

kisī kī zulf ke saude meñ raat kī hai basar
kisī ke ruḳh ke tasavvur meñ din tamām kiyā

maiñ yahī soch ke
kal raat nahīñ soyā agar

raat bhar jaltā rahā huuñ maiñ 'suhail' is aas meñ
maiñ to bujh jā.ūñgā lekin raushnī rah jā.egī

maiñ huuñ vo raat sitāre jise gahrā kar deñ
maiñ huuñ vo bazm jise raqs-e-sharar le Duube

shajar-e-ummīd bhī jal gayā vo vafā kī shāḳh bhī jal ga.ī
mire dil kā naqsha badal gayā mirī sub.h raat meñ Dhal ga.ī