Tags-Raat

ho na aamad tirī jis shab to vo shab shab hī nahīñ
niiñd us raat baġhāvat pe utar aatī hai

ghaTā hai ghanghor raat kaalī fazā meñ bijlī chamak rahī hai
milan kā siina ubhār par hai birah kī chhātī dhaḌak rahī hai

kal tak the mutma.in ki musāfir haiñ raat ke
ab raushnī milī hai to bīnā.ī chāhe

añdherī raat meñ kāsa-ba-dast baiThā huuñ
nahīñ ye aas ki āñkhoñ meñ raushnī aa.e

maiñ rāt-bhar
barahna jism par likhā gayā

kyā raat ke āshob meñ vo ḳhud se laḌā thā
ā.īñe ke chehre pe ḳharāsheñ sī paḌī haiñ

dil vo sahrā hai ki jis meñ raat din
phuul khilte haiñ bahār aatī nahīñ

jab na thā ye bayābān-e-dīvār-o-dar jab na thī ye siyāhī bharī rahguzar
kaise karte the ham guftugū raat bhar kaise suntā thā ye āsmāñ yā aḳhī

din par soch sulagtī hai yā kabhī raat ke baare meñ
koī baat nikal aatī hai kā.enāt ke baare meñ

raat ho din ho shor yā chuppī
saḳht bistar ho silvaToñ vaalā

kis raat nazar kī hai soī chashmak-e-anjum
āñkhoñ ke tale apne to vo māh-jabīñ thā

raat ke sar pe hai ujlā sā dupaTTa 'ja.afar'
ho na ho sehn-e-mohabbat bhī kahīñ hai raushan

mujh ko mālūm hai poroñ ke damakne kā javāz
raat maiñ ḳhvāb meñ mahtāb ko chhū kar aayā

raat ko sonā dekh-bhāl ke
chādar se bistar se ḳhatra

raat kī raat safar hai apnā
ham ko nūr-e-sahar se ḳhatra

maiñ akelā to nahīñ jhuum rahā huuñ 'sayyad'
taare bhī saath mire raat ga.e jhūmte haiñ

tilism hai ki tamāshā hai kā.enāt us kī
charāġh-e-hijr se raushan rahegī raat us kī

yūñhī jo bāñdhte rahe tamhīd aaj bhī
ye shab bhī biit jā.egī kal raat kī tarah

kal kā din haa.e kal kā din ai 'jaun'
kaash is raat ham bhī mar jaa.eñ

jaane qalam kī aañkh meñ kis kā zuhūr thā
kal raat mere giit ke mukhḌe pe nuur thā