Tags-Raat

rahe jo shab ko ham us gul ke saat koThe par
to kyā bahār se guzrī hai raat koThe par

rote phirte haiñ saarī saarī raat
ab yahī rozgār hai apnā

apne badan ko aur thakāo na dosto
Dhal jaa.e din to bojh uThānā hai raat kā

aur un se ye muamma aaj tak hal ho nahīñ paayā
ki din aatā hai pahle yā ki pahle raat hotī hai

raat har chaap pe aatā thā ḳhayāl
uTh ke dekhūñ koī aayā hī na ho

aisī duniyā meñ kab tak guzārā kareñ tum hī kah do ki kaise gavārā kareñ
raat mujh se mirī bebasī ne kahā bebasī ke liye ek taaza ġhazal

hai zikr-e-yār isī iltizām se rañgīñ
mahaktā jism javāñ raat be-ḳhudī bārish

raat to kyā
use DhūñDne ke liye

din nikaltā hai to aatī hai mujhe raat kī yaad
raat aatī hai to ik taaza balā aatī hai

raat āḳhir ho sitam-peshoñ pe aisā bhī nahīñ
vaqt ruk jaa.e kahīñ aa ke ye hotā bhī nahīñ

jidhar mahsūs ho ḳhushbū usī jānib baḌhe jaao
añdherī raat meñ rastoñ kā andāza nahīñ hotā

phir hijr kī lambī raat miyāñ sanjog kī to yahī ek ghaḌī
jo dil meñ hai lab par aane do sharmānā kyā ghabrānā kyā

hijr kī shaam akelī raat ke ḳhālī dar
sub.h-e-firāq kā zard ujālā tere naam

naale se apne āh-e-rasā raat baḌh ga.ī
neze se barchhī aur sivā kaam kar ga.ī

jugnuoñ kā harf merī aañkh meñ utrā na thā
raat kā andhā safar thā paañv meñ rasta na thā

zard lamhoñ kī thakan meñ āñganoñ kī aas thī
raat thī jañgal kī sar par chāñd bhī niklā na thā

us ke ā.īne se jis dam raat kā pahra uThā
be-nishāñ āvāz thī jis meñ koī lahja na thā

raat kā pichhlā pahar thā jab shajar kaaTā gayā
niiñd aisī thī ki panchhī koī bhī chīḳhā na thā

be-sitāra zindagī ke ghar meñ ab bhī raat ko
ik kiran tere ḳhayāloñ kī magar dekhegā kaun

unheñ kyā ḳhabar aane vaalā na aayā
barastī rahīñ raat bhar ye ghaTā.eñ