Tags-Raat

kyā zamāne meñ yuuñ hī kaTtī hai raat
karvaTeñ betābiyāñ añgḌā.iyāñ

ham ek shab meñ ka.ī ḳhvāb dekhte haiñ so ab
vo aa ke ḳhvāb meñ bhī rāt-bhar nahīñ rahtā

un kī farmā.ish na.ī din raat hai
aur thoḌī sī mirī auqāt hai

hoñ āzād-e-afkār lekin tafakkur meñ Duube hue se raheñ raat din
tabī.at kī be-vaj.h afsurdagī ke maze lūTeñ ham itnī fursat kahāñ

maiñ jis ke saath ka.ī din guzār aayā huuñ
vo mere saath basar raat kyuuñ nahīñ kartā

dil ke āñgan meñ ubhartā hai tirā aks-e-jamīl
chāñdnī-rāt meñ ho raat kī raanī jaise

ai raat agar maiñ bhī ik terā sitāra huuñ
sūraj ke nikalte hī be-nūr kiyā jā.ūñ

kal raat kahānī pariyoñ kī
baajī ne sunā.ī chupke se

ham bhī sau jaate the ma.asūm farishtoñ kī tarah
aur ye raat bhī hassās nahīñ thī pahle

'nasīm' gaañv kī masjid meñ raat kāTegā
ik ajnabī sā musāfir hai kis ke ghar jaa.e

din raat luT rahī haiñ ġharīboñ kī bastiyāñ
sargarm jab se luuT kā bāzār ho gayā

ThaThurtī raat meñ chādar bhī jin ke paas nahīñ
vo din nikālnā shab ke baġhair chāhte haiñ

lamp bujhte hī sirhāne kā parī aatī hai
rāt-bhar phir vahī mausam tire zindānī kā

latīf aisī kuchh is dil kī shīsha-kārī thī
ki ek raat bhī ham ahl-e-dil pe bhārī thī

ġham kī chādar oḌh kar so.e the kyā
raat bhar mere liye ro.e the kyā

chādar-e-ismat ke dhabbe aap ne
raat pī kar sub.h-dam dho.e the kyā

hichkiyāñ raat dard tanhā.ī
aa bhī jaao tasalliyāñ de do

gauhar-e-nāb-sūda ko zulf meñ mat dikhā ki yuuñ
merī kamand-e-shauq meñ raat ke vaqt aa ki yuuñ

har roz hī din bhar ke jhameloñ se nimaT ke
ro lete haiñ ham raat ke āñchal se lipaT ke

chāñdnī raat meñ shānoñ se Dhalaktī chādar
jism hai yā koī shamshīr nikal aa.ī hai