Tags-Raat

jo ghar meñ par-tav-e-zau thā use bujhā ga.ī raat
jo dil meñ virsa-e-ḳhūñ thā vo sab sahar ne liyā

dam āñkhoñ meñ aa rahā hai 'jur.at'
guzre hai ye aaj raat jī meñ

añdherī shab kā ye ḳhvāb-manzar mujhe ujāloñ se bhar rahā hai
to raat itnī tavīl ho jaa.e tā-qayāmat sahar na aa.e

ġhālib ki ye dil-ḳhasta shab-e-hijr meñ mar jaa.e
ye raat nahīñ vo jo kahānī meñ guzar jaa.e

zarā sī raat aur itnā savāb kaafī hai
mirī nazar ko faqat terā ḳhvāb kaafī hai

mirī āvāz pichhlī raat tujh tak kaise aa paatī
kisī gahre kueñ meñ raat bhar sotā rahā maiñ bhī

mirī raat merā charāġh merī kitāb de
mirā sahrā bāñdh le paañv se mujhe aab de

mirī chashm-e-nam kisī ratjage meñ ulajh ga.ī
mirī niiñd oḌh le raat bhar mujhe ḳhvāb de

utar gayā hai rag-o-pai meñ zā.iqa us kā
ajiib shahad sā kal raat us zabān meñ thā

masjid mandir girja-ghar meñ ashk bahānā kyā hotā hai
tum kyā jaano raat tahajjud haath uThānā kyā hotā hai

ik ajnabī ḳhayāl meñ ḳhud se judā rahā
niiñd aa ga.ī thī raat magar jāgtā rahā

fikr-e-suḳhan meñ raat jo aayā ḳhayāl-e-'mīr'
tā-der Diary pe qalam kāñptā rahā

mujh ko paanā ho to har lamha talab kar na mujhe
raat ke pichhle pahar māñg! duā huuñ maiñ bhī

din raat tire kūche meñ rove hai hamesha
āshiq ke ye hai mansab o jāgīr kā naqsha

raat ko niiñd nahīñ sub.h ko ārām nahīñ
un ke aane kā hai imkān ḳhudā ḳhair kare

na chhat pe chāñd Tikegā na raat Thahregī
har ek ḳhvāb ko āñkhoñ meñ mat sajāyā kar

raat dariyā meñ phir ik sho.ala sā chakrātā rahā
phir koī jaltī huī kashtī bhañvar meñ rah ga.ī

raat bhar hotā rahā hai kin ḳhazānoñ kā nuzūl
motiyoñ kī sī jhalak har barg-e-tar meñ rah ga.ī

din chaḌhe dhuup kī bāteñ nahīñ suntā koī
chāñdnī-rāt pukāre tirā āshiq mujh ko

sahmī hai shaam jaagī huī raat in dinoñ
kitne ḳharāb ho ga.e hālāt in dinoñ