Tags-Raat

jaise ham-bazm haiñ phir yār-e-tarah-dār se ham
raat milte rahe apne dar-o-dīvār se ham

yaad aatā hai samāñ mujh ko ḳhud-ārā.ī kā
chāñdnī raat meñ aalam tirī añgḌā.ī kā

tum qurb kī rāhat kyā samjho tum hijr kī vahshat kyā jaano
tum ne vo raat nahīñ kaaTī tum par vo azaab nahīñ aa.e

raat girī thī ik gaḌhDhe meñ
shaam kā haath pakaḌ kar niklī

aaj kī raat kaTegī kyuuñ kar saaz na jaam na to mehmān
sub.h talak kyā jāniye kyā ho aañkh lage yā jaa.e jaan

pichhlī raat kā sannāTā kahtā hai ab kyā ā.eñge
aql ye kahtī hai so jaao dil kahtā hai ek na maan

raat se jañg koī khel na.iiñ
tum charāġhoñ meñ itnā tel na.iiñ

tere bhī muñh kī raushnī raat ga.ī thī mah se mil
taab se taab ruḳh se ruḳh nuur se nuur zil se zil

kaalī raat aur kaale taare kaalā chandā
dhartī kā nā-bīnā laḌkā dekh rahā thā

khul ga.ī khiḌkī achānak phir bhī mujh ko Dar na thā
ab mirī āñkhoñ meñ koī raat kā manzar na thā

be-sukūnī nazar meñ hai terī
tere din raat kā patā hai mujhe

yuuñ tasavvur meñ basar raat kiyā karte the
lab na khulte the magar baat kiyā karte the

haa.e vo raat ki sotī thī ḳhudā.ī saarī
ham kisī dar pe munājāt kiyā karte the

us nigāh-e-nāz ne yuuñ rāt-bhar tajsīm kī
sab charāġhoñ meñ barābar raushnī taqsīm kī

raat pīchhe paḌ ga.ī thī ḳhauf ke saa.e liye
ḳhvāb se aage nikal kar vaqt meñ tarmīm kī

shaam hote hī charāġhoñ ko sajāyā taaq meñ
saarā din so kar guzārā raat kī tāzīm kī

ḳhuun ne terī yādeñ sulagtī huī raat ko sauñp diiñ
āñsuoñ ne tirā dard rūkhī havā ke havāle kiyā

chaman vahī ki jahāñ par laboñ ke phuul khileñ
badan vahī ki jahāñ raat ho gavārā bhī

vasl kī raat ke ik āḳhirī motī kī tarah
ḳhvāb bantī huī āñkhoñ meñ bashārat us kī

ḳhatm huā merā fasāna ab ye aañsū poñchh bhī lo
jis meñ koī taarā chamke aaj kī raat vo raat nahīñ