Tags-Raat

raat aatī hai to tāqoñ meñ jalāte haiñ charāġh
ḳhvāb zinda haiñ so āñkhoñ meñ jalāte haiñ charāġh

raat ka.ī āvāra sapne āñkhoñ meñ lahrā.e the
shāyad vo ḳhud bhes badal kar niiñd churāne aa.e the

jīvan ke vo pyāse lamhe barsoñ meñ raas aa.e the
raat tirī zulfoñ ke bādal mastī meñ lahrā.e the

dil kī vīrāñ nagrī pe ab ġham ke bādal chhā.e haiñ
dukh kī kaalī raat meñ bolo kab tak saath nibhāoge

tum falak par chāñd ban kar raushnī dete rahe
maiñ mahaktī sī tumhārī rāt-rānī rah ga.ī

hayūle raat bhar mehrāb-o-dar meñ phirte rahte haiñ
meñ samjhā thā ki apne ghar meñ Dar aisā nahīñ hogā

ye iztirāb ye lambā safar ye tanhā.ī
ye raat aur ye jañgal duā kiye jaa.eñ

tū mirī raat ko mahtāb se mahrūm na rakh
tire paimāne meñ hai māh-e-tamām ai saaqī

raat kī gahrī ḳhamoshī TimTimātī raushnī
ek maiñ tanhā musāfir dūsrī ḳhālī saḌak

chāñd yuuñ shāḳhoñ meñ uljhā hī na rahtā kal raat
'ashk' vo shaḳhs agar paas hī baiThā hotā

ai mūnis-e-dil ai hijr kī raat
le chal diye ab na ā.eñge ham

zindagī bhar mujhe is baat kī hasrat hī rahī
din guzārūñ to koī raat suhānī aa.e

rāt-bhar rone kā din thā
phir judā hone kā din thā

raat ke jañgal se aage
chain se sone kā din thā

sub.h-e-nau aa ga.ī tīrgī miT ga.ī shor hai har taraf inqalāb aa gayā
mujh ko Dar hai añdherā koī raat kā muñh pe Daale sahar kī naqāb aa gayā

thoḌā pī kar taaj uThāte phirte ho
mai-ḳhānoñ meñ raat batāo to jāneñ

ba.ad taklīf ke rāhat hai yaqīnī 'vāhid'
raat kā aanā hī paiġhām-e-sahar hotā hai

talāsh dhuup meñ kartā huuñ saarā din ḳhud ko
tamām-rāt sitāroñ meñ baT ke sotā huuñ

maiñ jaag jaag ke rāteñ guzārne vaalā
ik aisī raat bhī aatī hai DaT ke sotā huuñ

na luTtā din ko to kab raat ko yuuñ be-ḳhabar sotā
rahā khaTkā na chorī kā duā detā huuñ rahzan ko