Tags-Raat

dasht-e-hairāñ kā pata aaj bhī ma.alūm nahīñ
ab to rāhoñ meñ bhī ham raat nahīñ karte haiñ

aaj kī raat sāz-e-dard na chheḌ
dukh se bharpūr din tamām hue

saarī saarī raat maiñ jaagā
vo merī āñkhoñ meñ soyā

ik sham.a saarī raat jalī terī yaad meñ
har samt raushnī sī rahī terī yaad meñ

mirī sub.h ke sitāre tujhe DhūñDtī haiñ āñkheñ
kahīñ raat Das na jaa.e tirī raushnī se pahle

kyā yūñhī raat ke pahlū meñ kaTegī ye hayāt
kyā koī shahr ke logoñ ko jagāne kā nahīñ

zulm kī raat bahut jald Talegī ab to
aag chūlhoñ meñ har ik roz jalegī ab to

kab shaam Dhal ga.ī 'duā' aur raat aa ga.ī
ab tīrgī savāl thī aur maiñ safar meñ thī

raat Dhal jaa.e to hāthoñ kī lakīreñ jāgeñ
be-sukūñ zehn hamesha ye duā māñge hai

raat ke vaqt har ik samt the naqlī sūraj
saa.e the asl jo kirdār nibhāne aa.e

raat bhī terā dhyān bhī ham bhī
chāñd bhī āsmān bhī ham bhī

is tarah to aur bhī kuchh bojh ho jā.egī raat
kuchh kaheñ koī charāġh-e-vāqi.a raushan kareñ

kuchh na kuchh sochnā bas sochnā yuuñ hī din bhar
aur phir raat meñ pariyoñ kī kahānī paḌhnā

is tamannā meñ ki is raah se tū guzregā
diip har raah meñ har raat jalā.e ham ne

raat ko raat ho ke jaanā thā
ḳhvāb ko ḳhvāb ho ke dekhte haiñ

vahī din raat vahī ek se lamhoñ kā hisāb
suḳhan āġhāz karūñ umr kā jab se pūchho

ghanī-ghanerī raat meñ Darne vaalā maiñ
sannāTe kī tarah bikharne vaalā maiñ

ghaḌī kī Tik-Tik bol rahī hai raat ke shāyad ek baje haiñ
baTla house kī ek galī meñ moTe kutte bhauñk rahe haiñ

kis māh-vash se raat ham-āġhosh ham hue
aalam hilāl kā hai hamāre kanār meñ

jab raat hotī hai to sitāre nikalte haiñ
afshāñ zarūr chāhiye the zulf-e-yār meñ