Tags-Raat

din-rāt dekhtā huuñ hasīnoñ ke tazkire
rahtā hai shauq apnī hikāyāt kā mujhe

dil ne to hairāñ kiyā roz kahe hai yahī
raat kaTī uTh miyāñ sub.h huī chal kahīñ

raat baaqī hai abhī jaane kī jaldī kyā hai
sab chalā jā.egā ik tere chale jaane se

dekheñ to charāġhoñ ko ab kaun bujhā.egā
tāqoñ meñ lahū apnā har raat ko jaltā hai

ham hijr meñ jab jaage thī raat bahut 'saifī'
dīdār kā har mausam lamhāt meñ Dhaltā hai

dī shab-e-vasl mo.azzin ne azaañ pichhlī raat
haa.e kam-baḳht ko kis vaqt ḳhudā yaad aayā

mirī jabīñ kā chamaktā sūraj mire jilau meñ sadā rahā hai
maiñ raat kī zulmatoñ ko 'ārif' azal se lalkārtā rahā huuñ

tamām raat nahātī rahī thī bārish meñ
tabhī to itnī chamaktī huī sahar aa.ī

jo TūTtī bikhartī sī rahtī hai raat din
kuchh is tarah kī ek sadā hai ḳhalāoñ meñ

raat ab apne iḳhtitām pe hai
ehtirāman diye bujhā diije

na koī din na koī raat intizār kī hai
ki ye judā.ī bharose kī e'tibār kī hai

āvārgī meñ kab se guzartī hai raat bhī
āḳhir kabhī to shaam ko ghar jaanā chāhiye

huā jo din to huā us ko paas rusvā.ī
jo raat aa.ī to phir niiñd kā bahāna huā

paḌā kis kashmakash meñ yaar ke ghar raat maiñ jā kar
na uTh kar mudda.ī jaa.e na merā mudda.ā nikle

kis kā chehra kis kī āñkheñ dekh ke kaalī lambī raat
soch meñ Duubī chupke chupke chāñd sitāra likhtī hai

raat kī kaalī tahrīroñ se tab tak huuñ mahfūz 'nizām'
ek sitāra jab tak ruḳh par sub.h kā taarā likhtī hai

pahlī kiran kī dhaar se kaT jā.eñge ye par
iz.hār kī uḌaan faqat raat bhar kī hai

jo raat din mire marne kī kar rahe the duā
vo ro rahe haiñ janāze meñ hichkiyāñ le kar

sūraj ko choñch meñ liye murġhā khaḌā rahā
khiḌkī ke parde khīñch diye raat ho ga.ī

raat siine kī havelī gūñjī
aur dil shor machā kar niklā