Tags-Raat

zāhid jo apne roze se thoḌā savāb de
mai-kash use sharāb pilā.eñ tamām raat

ai qais be-qarār hai kuchh kohkan kī ruuh
aatī haiñ be-sutūñ se sadā.eñ tamām raat

tā sub.h mai-kade se rahī botaloñ kī maañg
barseñ kahāñ ye kaalī ghaTā.eñ tamām raat

ḳhalvat hai be-hijāb haiñ vo jal rahī hai sham.a
achchhā hai us ko aur jalā.eñ tamām raat

shab-bhar rahe kisī se ham-āġhoshiyoñ ke lutf
hotī raheñ qubūl duā.eñ tamām raat

daabe rahī paroñ se nasheman ko raat bhar
kyā kyā chalī haiñ tez havā.eñ tamām raat

kaaTā hai saañp ne hameñ sone bhī do 'riyāz'
un gesuoñ kī lī haiñ balā.eñ tamām raat

ārām mujhe bin tire ik pal nahīñ ghar meñ
juuñ mardumak-e-dīda huuñ din raat safar meñ

ik raat us ne chand sitāre bujhā diye
us ko lagā thā koī unheñ gin nahīñ rahā

ek darīche se do āñkheñ roz sadā.eñ detī haiñ
raat ga.e ghar lauTne vaalo shaad raho ābād raho

har raat us kī bāteñ sun kar tujh ko niiñd aatī hai 'zafar'
har raat usī kī bāteñ chheḌeñ ye to ajab biptā sī hai

kaise mar mar ke guzārī hai tumheñ kyā mālūm
raat bhar tāroñ bharī raat pe ronā aayā

maiñ ne Daalā jo koī vāsta añgāroñ ko
yaar kal raat añgeThī meñ baḌī barf paḌī

din kī ḳhushiyāñ na ġham kī raat baneñ
vaqt kā bhī kabhī safar Thahre

muddatoñ ke ba.ad jī chāhā thā chhat par soiye
raat pahlū meñ na leTī thī ki būñdeñ aa ga.iiñ

ḳhushī zarūr thī 'taimūr' din nikalne kī
magar ye ġham bhī sivā thā ki raat biit ga.ī

phir koī raat bujhā detī hai merī āñhkeñ
phir koī sub.h darīche mire vā kartī hai

raat bhī the gosh-bar-āvāz ham
dil dhaḌakne kī sadā aa.ī bahut

hijr ke din to hue ḳhatm baḌī dhuum ke saath
vasl kī raat hai kyuuñ marsiya-ḳhvānī kareñ ham

din meñ hai fikr-e-pas-andāzi-e-sarmāya-e-shab
raat bhar kāvish-e-sāmān-e-sahar meñ rahnā