Tags-Raat

raat ke pichhle pahar yādoñ kī dhuup
dhyān ke būḌhe shajar tak aa ga.ī

siyāh raat kā panchhī hai pañkh phailā.e
magar diloñ meñ bahut duur tak ujālā hai

sundar gulāb ḳhvāb to ḳhvāboñ kī baat hai
ye raat niiñd bhī to na laa.ī mire liye

vo bhī the ratjagoñ kī masāfat meñ ham-safar
tāroñ ne raat raat sajā.ī mire liye

raat ke ḳhvāb sunā.eñ kis ko raat ke ḳhvāb suhāne the
dhuñdle dhuñdle chehre the par sab jāne-pahchāne the

ham ko saarī raat jagāyā jalte bujhte tāroñ ne
ham kyuuñ un ke dar par utre kitne aur Thikāne the

maiñ diyā-salā.ī kī raushnī meñ talāsh kartā rahā tumheñ
magar apnā maqsad añdherī raat batānā ho kahīñ yuuñ na ho

maiñ tumhāre ishq meñ rāt-din jo dikhā.ī detā huuñ mutma.in
mirā ghar hī sirf luTā ho dil to luTā na ho kahīñ yuuñ na ho

na suhāg-rāt chamak sakī yūñhī kasmasāte sahar huī
koī diip gum-shuda thāliyoñ meñ jalānā ho kahīñ yuuñ na ho

niiñd aatī hai kahāñ ujḌe makāñ meñ 'shāhid'
koī aaseb kā har raat gumāñ rahtā hai

raat ḳhvāboñ meñ jāgne ke liye
ḳhud ko din bhar sulā.e rakhte haiñ

tujh ko har phuul meñ uryāñ sote
chāñdnī-rāt ne dekhā hogā

mauj-e-ḳhūñ sar se guzar jaatī hai har raat mire
phuuT kar ḳhvāboñ meñ rotā hai koī saat mire

raat ko bāhar akele ghūmnā achchhā nahīñ
chhoḌ aao us ko ghar tak rāstā achchhā nahīñ

chand lamhoñ ke liye anjuman-ārā.ī thī
phir vahī maiñ thā vahī raat kī tanhā.ī thī

raat bhar bārish darīche ke qarīb
motiye kī bel se lipTī huī

umr bhar kī rafāqatoñ ke ba.ad
hijr kī ek raat kam to nahīñ

raat jaltī rahī thī vo sham.a
dard jis kā bayāñ nahīñ hotā

raat to vaqt kī pāband hai Dhal jā.egī
dekhnā ye hai charāġhoñ kā safar kitnā hai

mutma.in thā din ke bikhrāv se maiñ lekin ye raat
dāna-dāna phir ajab Dhab se pirotī hai mujhe