Tags-Raat

raat ḳhāmushī le kar
jhūltī hai peḌoñ par

raat ko ḳhauf mirā chāñd koī chhīn na le
chāñd ko raat ke Dhal jaane kā andesha hai

bichhaḌ ke ghar se yahī sochtā huuñ maiñ din-rāt
shajar se TuuT ke pattoñ kī zindagī kyā hai

bas ek raat kā mehmān hai parinda yahāñ
use pata hī nahīñ shāḳh chāhtī kyā hai

maiñ sochtā rahā kal raat baiTh kar tanhā
ki is hujūm meñ merā shumār kam hogā

din kā libās-e-dard thā vo to pahan chuke
raat aa.ī jaane kaun sā ġham oḌhnā paḌe

lamhoñ ke taar khīñchtā rahtā thā raat din
ik shaḳhs le gayā mirī sadiyāñ sameT ke

maiñ jhuuT ko sach se kyuuñ badlūñ aur raat ko din meñ kyuuñ gholūñ
kyā sunñe vaalā bahrā hai kyā dekhne vaalā andhā hai

raat bhar jashn-e-mulāqāt munavvar hī sahī
sub.h-dam koī kisī kā nahīñ hone vaalā

āsmāñ raat agar royā nahīñ hai to batā
barg-e-gul par hai bhalā qatra-e-shabnam kaisā

vo jo raat ko din se badalte rahte the
miT ga.e dil se naqsh aise armānoñ ke

in ko sher karūñ, andar kī baat kahūñ
mausam raat ghaTā, sūraj ik taarā chāñd

maiñ ne jiitī ye bāzī, hai raat gavāh
thak kar palTā chaudhvīñ shab, phir haarā chāñd

dil ujḌī huī ek sarā.e kī tarah hai
ab log yahāñ raat jagāne nahīñ aate

maañd hai rāt-din tire aage
māhtāb aur āftāb kā rañg

dekhī thī ek raat tirī zulf ḳhvāb meñ
phir jab talak jiyā maiñ pareshān hī rahā

bikhar gayā thā jo kal raat kirchiyoñ kī tarah
mirī nigāh vo TuuTā sā ḳhvāb māñge hai

kaisā chehra hai raat kī tafsīl
kaun jal kar bujhā hai umr ke saath

raat kī jashn-gāh par os paḌī hai niind kī
bād-e-sahar na jaane kyuuñ mahv-e-ḳhirām ho ga.ī

ye raat āḳhirī lorī sunāne vaalī hai
maiñ thak chukā huuñ mujhe niiñd aane vaalī hai