Tags-Raat

tumhārī shaan hamārī bisāt kyā hai yahāñ
shikoh-e-ḳhusrav-e-ḳhāqān ek raat kā hai

bas ek shab kā ujālā hai us ke dāman meñ
ki ye charāġh nigahbān ek raat kā hai

jis raat khulā mujh pe vo mahtāb kī sūrat
vo raat sitāroñ kī amānat hai sahar tak

maiñ tez dhuup meñ jal kar bhī yaad kartā huuñ
vo sard raat meñ us kā lihāf ho jaanā

raat din rahne lagī us sitam-ījād kī yaad
'hasrat' ab dekhiye anjām hamārā kyā ho

phir vahī intizār kī zanjīr
raat aa.ī diye jalāne lage

maiñ din meñ ḳhvāb banātā huuñ rañg rañg ke ḳhvāb
magar ye raat unheñ mismār karne aatī hai

na jaane kyuuñ bujhī āñkhoñ meñ jugnūñ se chamakte haiñ
abhī to vaqt baaqī hai añdherī raat Dhalne meñ

kab talak sar-gashta rahiye din ko misl-e-gard-bād
raat ko juuñ sham.a jalne ko muhayyā hojiye

ham din-bhar duniyā-dārī meñ hañs hañs ke bāteñ karte haiñ
phir saarī raat pighalte haiñ ik ashk raqam karne ke liye

raat mujrim thī dāman bachā le ga.ī
din gavāhoñ kī saf meñ khaḌā rah gayā

isī liye to añdhere hasīn lagte haiñ
ki raat mil ke tire gesuoñ se aatī hai

abhī se harf-e-ruḳhsat kyuuñ jab aadhī raat baaqī hai
gul o shabnam to hote haiñ judā āhista āhista

do charāġhoñ se raat raushan hai
ek terā hai dūsrā merā

gaatā rahā hai duur koī hiir raat bhar
maiñ dekhtā rahā tirī tasvīr raat bhar

tāroñ ke TūTne kī sadā gūñjtī rahī
hotī rahī hai raat kī tash.hīr raat bhar

sūraj ne sub.h-dam mire paañv meñ Daal dī
maiñ toḌtā rahā huuñ jo zanjīr raat bhar

maiñ ḳhāmushī meñ Duub ke kuchh sochtā rahā
kuchh boltī rahī tirī tasvīr raat bhar

maiñ chal paḌā to kaT ke vo qadmoñ meñ aa girī
laTkī hai mere sar pe jo shamshīr raat bhar

maiñ so gayā 'rashīd' to haala bikhar gayā
sūjhī na koī chāñd ko tadbīr raat bhar