Tags-Raat

'vahshat' us bazm meñ rahe the raat
sub.h nikle haiñ dard-e-sar le kar

purkhoñ se unvān sunā hai bhuuk aur niiñd meñ rishta hai
aaj kī raat kaThin guzregī aaj to ghar meñ kuchh bhī nahīñ

māntā huuñ ki hai zulmāt-e-azal us kā nasīb
raat kī zid hai use apnī fuġhāñ tak dekhūñ

āsmāñ thā yā shikasta chhat añdherī qabr kī
raat bhar dekhā kiyā maiñ āsmāñ dekhā huā

ham ne dekhā hai faqat ḳhvāb khulī āñkhoñ se
ḳhvāb thī vasl kī vo raat samajhtā hī nahīñ

raat purvā.ī ne us ko bhī jagāyā hogā
raat kyuuñ kaT na sakī raat samajhtā hī nahīñ

din ko ujlī ridā oḌh letā huuñ maiñ
dekhnā raat ko phir tamāshā mirā

kaalī raat ke sannāTe ko maiñ ne pīchhe chhoḌ diyā
shab-bhar taare ginte ginte dekh sahar tak aa.ī huuñ

barsoñ se ghūmtā hai isī tarah raat din
lekin zamīn miltī nahīñ āsmān ko

haigā nūrānī ruḳh-e-raushan tirā
raat ko mahtāb din ko āftāb

niiñd uḌtī rahegī āñkhoñ se
jashn ye rāt-bhar rahegā kyā

laḌne ko us se raat maiñ ġhusse meñ laḌ liyā
par jab vo uTh chalā to kaleja pakaḌ liyā

raat kinārā dariyā din
raat ke pīchhe bahtā din

tū dhartī kī pahlī raat
maiñ dhartī kā pahlā din

tere badan meñ jaagī raat
mere badan meñ Duubā din

us ne ḳhat meñ bheje haiñ
bhīgī raat aur bhīgā din

maiñ us mahfil kī raushan sā.atoñ ko chhoḌ kar gum huuñ
ab itnī raat ko darvāza apnā kaun kholegā

ġham-zada raat kī tanhā.ī meñ
ye udaas aur fasurda bargad

kaam chup rah ke kiyā karte haiñ lekin
raat ke sab raaz jugnū jānte haiñ

de do na ek baar mirā saath jān-e-man
aatī nahīñ hai niiñd mujhe raat jān-e-man