Tags-Raat

kisī mai-kada meñ rahā 'jigar' ki thā mahv-e-ḳhvāb meñ raat bhar
huiiñ kyā bashārateñ sub.h-dam ki uThā to zamzama-ḳhvāñ uThā

raat fasīl-e-shahr meñ ek shigāf kyā milā
ḳhuun kī ik lakīr sī sub.h nazar nazar meñ thī

havā be-mehr thī us raat ThanDī aur kaTīlī
saañs lenā sar se ūñchī lahr se Takkar lagānā thā

raat guzrī ki shab-e-vasl kā paiġhām milā
so ga.e ḳhvāb kī bāñhoñ meñ jo ārām milā

raat bhīgī to sisaktī huī ḳhāmoshī se
āsmāñ phuuT paḌā jism ke chhāloñ kī tarah

raat āñkhoñ meñ hayā le ke guzar jaatī thī
lamha-e-shauq bahut chīñ-ba-jabīñ rahtā thā

ret ke shānoñ pe shabnam kī namī raat ga.e
aur kuchh tez huī tishna-labī raat ga.e

baam o dar jaag uThe shauq ne āñkheñ kholīñ
dil kī dahlīz pe dastak sī huī raat ga.e

mere siine meñ kisī aag kā jalnā din bhar
us ke hoñToñ pe vo halkī sī hañsī raat ga.e

ik isī ḳhvāb ne kyā kyā na tamāshā dekhā
niiñd ke haath meñ jaadū kī chhaḌī raat ga.e

fat.h paa.ī hai sarāboñ pe mire ashkoñ ne
ġham ne bāñdhī hai ka.ī baar nadī raat ga.e

har raat intizār-e-sahar kar liyā gayā
is tarah zindagī ko basar kar liyā gayā

raat aurat hai garche tīra-jabīñ
dil magar kārvān-e-sarā.e nahīñ

raat vahī phir baat huī nā ham ko niiñd nahīñ aa.ī
apnī ruuh ke sannāTe se shor sā ik uThtā dekhā

maiñ raat TuuT ke royā to chain se soyā
ki dil kā zahr mirī chashm-e-tar se niklā thā

maiñ ek raat mohabbat ke sā.ebān meñ thā
mirā tamām badan ruuh kī kamān meñ thā

ye mere haath kī lakīreñ khul rahī thiiñ yā ki ḳhud
shagun kī raat ḳhushbū-e-hinā hī aur ho ga.ī

kahāñ ye raat kahāñ terī bū-e-pairāhan
chalā thā aaj ḳhayāloñ kā silsila kaisā

ḳhālī nahīñ ḳhalal se 'joshish' ye ḳhaibar-e-dil
din raat mauj ġham kī is se chimaT rahī hai

is galī se us galī tak dauḌtā rahtā huuñ maiñ
raat utnī hī mayassar hai safar utnā hī hai