Tags-Rahbar

rahbar banā huā hai jo saaya qadam qadam
partav tirā hī mere kahīñ ās-pās hai

ye mashkūk aadmī luuTe haiñ jis ne kārvāñ barsoñ
duā māñgūñ kahīñ ye rahbar-e-manzil na ban jaa.e

vaa.e qayāmat sar hai salāmat suune paḌe haiñ dār-o-rasan
ham ko bāġhī kaun kahegā rahbar kaun bānegā

manzil pe na pahuñchā jab koī ilzām usī par kyuuñ aa.e
rah-rav ke bhaTakne meñ hai kuchh rahbar kī zimme-dārī bhī

munkashif mujh par huā 'jāmī' vo rahbar thā mirā
jis haqīqat-āshnā ko bāzīgar samjhā thā maiñ

uThāyā nāz-e-rahbar bhī junūñ bhī aazmā dekhā
magar barham nizām-e-kārvāñ yuuñ bhī hai aur yuuñ bhī

manzil to mere apne irādoñ ke saath hai
rahbar mile na ab koī naqsh-e-qadam mile

kah diyā thā ki ye rahbar jo chunā hai tum ne
saaf tote kī tarah aañkh badal jā.egā

jāntā huuñ kaun kyā hai aap kyuuñ deñ mashvara
maiñ luTeroñ se bhī vāqif aur rahbar-āshnā

is fāsloñ ke dasht meñ rahbar vahī bane
jis kī nigāh dekh le sadiyoñ ke paar bhī

rahbar-e-insāniyat terī aqīdat ke tufail
ham ne ġhalba pā liyā hai gardish-e-ayyām par

rahzan ho to hāzir hai matā-e-dil-o-jāñ bhī
rahbar ho to manzil kā pata kyuuñ nahīñ dete

faiz-e-nigāh-e-rahbar-e-kāmil kā hai asar
'sāqī' hai mahv tā.at-e-rabb-e-vadūd meñ

tirī azmat kā munkir thā na huuñ ai rahbar-e-kāmil
ab is ko kyā karūñ maiñ rahguzar kuchh aur kahtī hai

dīdanī ab safar-e-zīst kā manzar hogā
jis ne luuTā sar-e-bāzār vo rahbar hogā

manzil se ham-kanār kare kārvāñ ko jo
aisā koī jahān meñ rahbar talāsh kar

qāfila aa kar sar-e-manzil bhī ho jaatā hai gum
rāhzan ko jab kabhī rahbar banā lete haiñ ham

koī madad ko na aa.egā aisī manzil hai
panāh jaañ ko milegī agar hai rahbar vo

rahbar-e-tabl-o-nishāñ aur zarā tez qadam
haañ mire azm-e-javāñ aur zarā tez qadam

rahbar-e-qaum-o-vatan us ko ḳhudā sharmā.e
ḳhud jo bhaTkā ho vo auroñ kī ḳhabar kyā legā