Tags-Rang

sūraj kī kiran kā sho.abada hai
rañg-e-ruḳh-e-zard uḌ gayā hai

kyā ik khulā fusūñ hai shafaq rañg dopahar
kyā raat ho ga.ī hai ki shahpar palaT kar aa.e

yā be-ḳhabar the vus.at-e-dariyā-e-rang se
yā chashm-e-be-hunar the shanāvar palaT kar aa.e

haal ab tañg hai zamāne kā
rañg be-rañg hai zamāne kā

kuchh ajab rañg hai is aan tabī.at kā 'na.īm'
kuchh ajab tarz ke is vaqt suḳhan aa.e haiñ

rañg meñ haiñ saare ghar vaale khanak rahe haiñ chaa.e ke pyāle
duniyā jaag chukī hai lekin apnā saverā nahīñ huā hai

ḳhatm haiñ is shoḳh rā.anā par tarah-dārī ke rañg
qadd-e-bālā jis kā hai rashk-e-qazīb-e-ḳhaizrāñ

ye kaise pāsbān-e-gulsitāñ haiñ jo bahāroñ meñ
guloñ kā rañg-o-bū shāḳhoñ kā tum tak bech dete haiñ

rañg to maujūd kī tasvīr ho sakte nahīñ
vo jo manzar ḳhvāb haiñ ta.abīr ho sakte nahīñ

dekhtī aañkh 'ziyā' hairāñ hai dekh ke dahr ke rañg
pal kī pal meñ badal jaate haiñ manzar sair ke biich

jalva-gāh-e-dil meñ aa jaate vo be-parda agar
ham bhī rañg-e-be-ḳhudī ham rañg-e-mūsā dekhte

dil kī duniyā dekh kar kyuuñ rañg-e-duniyā dekhte
dekhne vaalo nahīñ ham dekh kar kyā dekhte

dard ko darmāñ banāne kā hunar rakhtā thā vo
oḌh kar jo vaqt kī ḳhush-rañg chādar so gayā

merī āvāz ko tarsegā tirā rañg-mahal
maiñ to ik baar sadā de ke chalā jā.ūñgā

jise kuchh nazar na aayā ho jahāñ rañg-o-bū meñ
vo khilā gulāb dekhe vo tirā shabāb dekhe

mirā dayār shanāsā-e-rañg-o-nūr nahīñ
agarche shams-o-qamar is nagar se duur nahīñ

nahīñ do qubba-e-pistān shoḳh-o-shañg siine par
nazar aate haiñ mīnā-e-mai-e-gul-rañg siine par

nahīñ rakhe haiñ tū ne har tarah ke phuul añgiyā meñ
javāhar ye nazar aate haiñ rañgā-rañg siine par

terī nazar kā rañg bahāroñ ne le liyā
afsurdagī kā ruup tarānoñ ne le liyā

vahī 'tarz' tujh pe rahīm hai ye usī kā faiz-e-karīm hai
ki asātiza ke bhī rañg meñ jo ġhazal kahī vo kharī rahī