Tags-Rang

sub.h phūTī to āsmāñ pe tire
rañg-e-rukHsār kī fuhār girī

ye rañg-o-nūr kī duniyā nazar-navāz sahī
tire faqīr magar e'tinā nahīñ karte

lamha-e-imkān ko pahlū badalte dekhnā
ātish-e-be-rañg meñ ḳhud ko pighalte dekhnā

zard malbūs meñ aatī haiñ bahāreñ 'shāhid'
aur tū rañg ḳhizāoñ kā bhī dhānī māñge

aañkh meñ dhundlā gayā nikhre hue chehroñ kā rañg
jagmagāte ā.inoñ ko kis ne mailā kar diyā

jab tū hī tū hai to phir ġhaib o huzūrī kaisī
ek hī rañg baqā aur fanā kā niklā

mushk-o-sandal ho tire rañg se bāloñ ham-sar
ġhussa dil ko mire kis tarah na aa jaa.e qarīb

ab rañg ke nasloñ ke but TuuT chuke saaqī
ab kyuuñ diye jaate haiñ pahchān ke paimāne

dīvār hī niklī pas-e-dīvār fusūñ rañg
kohrā hī bikhartā milā chehroñ kī dhanak tak

kaun is rañg se jaame se huā thā bāhar
kis se sīkhā tirī talvār ne uryāñ honā

gumāñ kī be-rañg sā.atoñ meñ
navāh-e-karb-o-balā se darbār-e-shām tak ham

ye ishq thā ki jis ne diyā rañg-e-shola-tāb
aalam tamām naqsh-e-sukūt-o-jumūd thā

dil meñ bharī hai ḳhaak meñ milne kī aarzū
ḳhākistarī huā hai hamārī qabā kā rañg

ye fazā ke rañg khule khule isī pesh-o-pas ke haiñ silsile
abhī ḳhush-navā koī aur thā abhī par-kushā koī aur hai

mire hone se ḳhud merā ta.alluq
ba-rañg-e-intihā rakkhā hai us ne

chāñd kī chāñdnī bajā lekin
rañg us kā bhī saaf suthrā thā

āḌī-tirchhī sī lakīreñ khīñchtā huuñ aur phir
us ko har manzar meñ rakh kar rañg bhar detā huuñ maiñ

rañg-e-māhaul badalne kī zarūrat bhī durust
kaun kahtā hai ki hālāt pe tanqīd na kar