Tags-Religion

tere maz.hab meñ hifāzat aabrū kī hai gunāh
māñgtī hai terī bātoñ se nissā.iyat panāh

yahāñ maz.hab ke Thekedār bhī milte haiñ bahtere
yahāñ laTh-bāz-o-chāqū-mār bhī milte haiñ bahtere

kareñ kyā riñd mashrab iḳhtiyār ik maz.hab ai vaa.iz
nahīñ dil toḌnā manzūr haftād-o-do-millat kā

banda huuñ ishq kā mirā maz.hab na pūchhiye
āzād ho ke gabrū musalmāñ se duur huuñ

kabhī na hoñge murīd-e-jiddat nahīñ haiñ mushtāq-e-husn-e-bid.at
hamārā mashrab hai sūfiyāna hamārā maz.hab sanātanī hai

bhuut ban kar nāchtā hai sar pe jab qaumī vaqār
le ke maz.hab kī sipar aatā hai jab sarmāya-dār

yahāñ tasbīh kā halqa vahāñ zunnār kā phandā
asīrī lāzmī hai maz.hab-e-shaiḳh-o-barahman meñ

mashrab meñ to durust ḳharābātiyoñ ke hai
maz.hab meñ zāhidoñ ke nahīñ gar ravā sharāb

vahī haiñ qatl-o-ġhārat aur vahī kohrām hai saaqī
tamaddun aur maz.hab kī ye ḳhūnī shaam hai saaqī

aqā.ed vahm haiñ maz.hab ḳhayāl-e-ḳhām hai saaqī
azal se zehn-e-insāñ basta-e-auhām hai saaqī

qaid-e-maz.hab vāqa.ī ik rog hai
aadmī ko chāhiye āzād ho

kañkar patthar kī tāmīreñ maz.hab kā mafhūm nahīñ
zehnoñ kī ta.amīr bhī kiije gumbad aur mehrāb ke saath

aaj tañg aa ke ye nāseh ko diyā maiñ ne javāb
maz.hab-e-shaiḳh judā mashrab-e-rindāna judā

rāh-e-haq meñ na the pāband kisī maz.hab ke
tārik-e-subah-o-zunnār gurū-nānak the

lok kahāniyoñ meñ mā-ba.ad-e-jadīd kī pesh-āmad jaise
fiction kī re-cell value meñ maz.hab kā hissa hai

zaat maz.hab ki zabāñ naam usī ke to haiñ sab
ḳhud ko jis qaid se tā-umr chhuḌāyā na gayā

batā jaa.ez hai kis maz.hab meñ ḳhūn-e-be-gunah zālim
tū hindū hai musalmāñ hai yahūdī hai ki tarsā hai

maz.hab ke tājiroñ se bache haiñ isī liye
is shahr ke to log ḳhatarnāk bhī nahīñ

jahālat rog thā jo dil ke andar
vahī maz.hab hamārā ho gayā hai

ab to maz.hab koī aisā bhī chalāyā jaa.e
jis meñ insān ko insān banāyā jaa.e