Tags-Religion

insāñ ulaT rahā hai ruḳh-e-zīst se naqāb
maz.hab ke ehtimām fusūñ-parvarī kī ḳhair

us ke maz.hab kā e.atibār hai kyā
'mehr' ik rind-e-lā-ubālī hai

na-jāne kaun se maz.hab se dīvāne kā rishta thā
ki us ne apnī hī tanhā sī ik bastī basā lī thī

shikast-e-rañg-e-maz.hab kā asar dekheñ na.e murshid
musalmānoñ meñ kasrat ho rahī hai bāda-noshī kī

kahīñ pe
maz.hab javāz thā to

hamārā dīn-o-maz.hab ai sajan terī itā.at hai
ḳhudā kā kyuuñ na ho bandā ki jin tujh kuuñ sañvārā hai

apnī urdu to mohabbat kī zabāñ thī pyāre
ab siyāsat ne use joḌ diyā maz.hab se

baġhair pūchhe mire sar meñ bhar diyā maz.hab
maiñ roktā bhī to kaise ki maiñ to bachcha thā

maz.hab kī ḳharābī hai na aḳhlāq kī pastī
duniyā ke masā.ib kā sabab aur hī kuchh hai

kuchh dil se ehtirām nahīñ vāldain kā
bezār apne diin se maz.hab se duur hai

mirā maz.hab faqat insāniyat hai
jise har-hāl meñ maiñ pūjtā huuñ

roz-e-visāl jis ko kahtī hai ḳhalq vo hī
maz.hab meñ āshiqoñ ke roz-e-vafāt bhī hai

mohabbat-āshnā dil maz.hab-o-millat ko kyā jaane
huī raushan jahāñ bhī sham-e-parvāna nahīñ aayā

ashk ḳhūnīñ suuñ jo kiyā hai vazū
maz.hab-e-ishq meñ namāzī hai

maiñ kufr o diiñ se guzar kar huā huuñ lā-maz.hab
ḳhudā-parast se matlab na but-parast se kaam

mulk-o-millat qaum-o-maz.hab dosto
kyā nahīñ biktā ḳharīdāroñ ke biich

vatan-parastī hamārā maz.hab haiñ jism-o-jāñ mulk kī amānat
kareñge barpā qahr adū par rahegā daa.im vatan salāmat

shii.a sunnī meñ to bakheḌe haiñ
naam luuñ kis ke aage maz.hab kā

jo lā-maz.hab ho us ko millat-o-mashrab se kyā matlab
mirā mashrab hai rindī riñd ko maz.hab se kyā matlab

koī maz.hab nahīñ lagā is kā
raushnī ik sī de gayā sūraj