Tags-Rukhsar

jab bhī lahū meñ rañg-e-ḳhizāñ kī saḳhtī baḌhne lag jaatī hai
chand lab o ruḳhsār bulā kar jashn-e-bahārī kar lete haiñ

lab-o-ruḳhsār o jabīñ se miliye
jī nahīñ bhartā kahīñ se miliye

bosa-e-ruḳhsār par takrār rahne dījiye
lījiye yā dījiye inkār rahne dījiye

jo jism o jaañ se chalī jism o jaañ talak pahuñchī
vo mauj-e-garmi-e-ruḳhsār-o-lab nahīñ aa.ī

chheḌā zarā sabā ne to gulnār ho ga.e
ġhunche bhī mah-jamāloñ ke ruḳhsār ho ga.e

maiñ bhī hoñToñ se kahūñgā kam kareñ jalne kā shauq
aap agar sargarmī-e-ruḳhsār kam kar dījiye

nazar is husn par Thahre to āḳhir kis tarah Thahre
kabhī ḳhud phuul ban jaa.e kabhī ruḳhsār ho jaa.e

Dhalā hai husn lekin rañg hai ruḳhsār-e-jānāñ par
abhī baaqī hai kuchh kuchh dhuup dīvār-e-gulistāñ par

zindagī guzrī abhī is aag ke girdāb meñ
dil se kyuuñ jaane lagī hirs-lab-o-ruḳhsār abhī

khul gayā mus.haf-e-ruḳhsār-e-butān-e-maġhrib
ho ga.e shaiḳh bhī hāzir na.ī tafsīr ke saath

gesu-e-pechāñ tire ruḳhsār par
sūra-e-vallail hai qur.ān meñ

us ke ruḳhsār dekh jiitā huuñ
aarzī merī zindagānī hai

chashm-o-gesū kā koī zikr na ruḳhsār kī baat
baiTh kar kījiye un se dar-o-dīvār kī baat

chashm o ruḳhsār ke azkār ko jaarī rakkho
pyaar ke naame ko doharāo ki kuchh raat kaTe

khīñcheñge mire ā.īna-ruḳhsār kī tasvīr
dekhe to koī mānī-o-bahzād kī sūrat

maġhrūr na ho chāñd se ruḳhsār par apne
ye qumquma raushan hai charāġh-e-saharī se

ḳhāl-e-ruḳhsār ko dāġh-e-mah-e-kāmil bāñdhā
chashm-e-maḳhmūr ko kaunain kā hāsil bāñdhā

rahīn-e-marg-e-tamannā thī kāmrānī-e-vasl
jhulas gayā hai mujhe qurb-e-sho.ala-e-ruḳhsār

koī baat aisī aaj ai merī gul-ruḳhsār ban jaa.e
ki bulbul bātoñ bātoñ meñ dam-e-guftār ban jaa.e

un ke ruḳhsār pe Dhalke hue aañsū tauba
maiñ ne shabnam ko bhī sho.aloñ pe machalte dekhā