Tags-Sach

soch-samajh sab sach hai lekin dil kī baat hai aur
duur thī yuuñ to aañkh bhañvar kī pahuñchā tair ke biich

sach bolnā tapāk se milnā har ek se
jazbe ye vo haiñ jin meñ harārat nahīñ rahī

sach ko kahne kā hausla hai mujhe
apne anjām kā pata hai mujhe

ye sach hai ki maiñ is tamāshe meñ shāmil nahīñ
phir ye kaisī sazā mil rahī hai mujhe

sach jahāñ pā-basta mulzim ke kaTahre meñ mile
us adālat meñ sunegā adl kī tafsīr kaun

sach hai tum ne jo lagāyā nahīñ muñh ġhunchoñ ko
unheñ phir kis ke tabassum kī adā aa.ī hai

mehr zar ḳhaak ko kartā hai ye sach hai lekin
is se kuchh baḌh ke haiñ sāhab-nazrān-e-dehlī

vo kahte haiñ maiñ zindagānī huuñ terī
ye sach hai to un kā bharosā nahīñ hai

ye sach hai nāseh! na hogā milnā nahīñ hai achchhā na hogā achchhā
phir aap ko kyā burā kaheñge to apne haq meñ burā kareñge

ye bhī sach hai ki amal mujh pe kisī ne na kiyā
varna kahne ko to mash.hūr maqūla huā maiñ

milnā na milnā ek bahāna hai aur bas
tum sach ho baaqī jo hai fasāna hai aur bas

aa.ine meñ aks khiltā hai gul-e-hairat nahīñ
log sach kahte haiñ āñkhoñ sī koī ne.amat nahīñ

dam nikal jā.egā hasrat hī meñ ik din apnā
sach kahā tum ne kuchh insān kī buniyād nahīñ

vo aur va.ada vasl kā qāsid nahīñ nahīñ
sach sach batā ye lafz unhī kī zabāñ ke haiñ

mujh ko un arzī ḳhudāoñ ne agar luuTā hai
kyā ye sach hai ki mashiyyat bhī rahī dosh-ba-dosh

terā merā karte karte umr guzārī jaatī hai
sach to ye hai terā merā merā terā kuchh bhī nahīñ

jo sach pūchho to ab ke yuuñ huā hai
tere ġham se bhī uktā.e bahut haiñ

suno
kyā sach-much

ḳhvāb to ḳhvāb haiñ pal bhar meñ bikhar jaate haiñ
sach to ye hai ki bas ik kāhish-e-jāñ raqs meñ hai

tum mirī zindagī ho ye sach hai
zindagī kā magar bharosā kyā