Tags-Sach

agar ye sach hai
to log kyā sirf ek hī sach ko mānte haiñ

ye sach hai vaqt par be-raunaqī bhī kaam aatī hai
nihāl-e-ḳhushk ko khaTkā nahīñ hotā hai patjhaḌ kā

nāseh ke sāmne kabhī sach boltā nahīñ
merī zabāñ meñ rañg tumhārī zabāñ ke haiñ

sach hai merī baat kā kyā e'tibār
sach kahūñgā jhuuT jaanī jā.egī

āj-kal ham meñ agar sach pūchho
shakl anqā hai misāl-e-tahzīb

kyā mire haal pe sach-much unheñ ġham thā qāsid
tū ne dekhā thā sitāra sar-e-mizhgāñ koī

Thiik hai koī madad ko nahīñ pahuñchā lekin
ye bhī sach hai ki 'zafar' ham bhī pukāre nahīñ the

jo sach pūchho to zabt-e-ārzū se kuchh nahīñ hotā
parinde mere siine meñ pur-afshānī bhī karte haiñ

kahāñ le kar chaloge sach kā parcham
muqābil jhuuT kā lashkar lagegā

ye sach hai bakvās nahīñ hai
vo ab dil ke paas nahīñ hai

phir is ke ba.ad har ik faisla sar āñkhoñ par
magar gavāh kā sach bolnā zarūrī hai

āñkheñ bhī haa.e naza.a meñ apnī badal ga.iiñ
sach hai ki bekasī meñ koī āshnā nahīñ

dhuul kab tak jhoñke ik dūsre kī aañkh meñ
ek din to jhuuT sach kā faisla honā hī thā

ki mushkiloñ se Daro nahīñ aur kaam himmat se lo hamesha
tabhī saphaltā milegī ik din ye sach kisī se chhupā nahīñ hai

bebas ko doshī Thahrā.e us jañgal kā nayāy
sach kī laash pe koī na ro.e jhuuT ko siis navā.e

kyā bolegā aaj tarāzū bhed abhī khul jā.egā
ik palḌe meñ sach rakkhā hai ek meñ chāñdī rakkhī hai

jo sach pūchho to ham tum zindagī bhar hārte aa.e
hamesha be-yaqīnī ke ḳhatar se kāñpte aa.e

shaiḳh-sāhib! sach to ye hai un dinoñ piitā thā maiñ
un dinoñ piitā thā ya.anī jin dinoñ jiitā thā meñ

ye baat alag hai ki maiñ ne jhāñkā nahīñ galī meñ
ye sach hai koī sadā.eñ detā guzar rahā thā

gulzār yak-ba-yak jo mahakne lagā hai yuuñ
sach kah sabā tū phirtī hai yaañ kis kī bū liye