Tags-Sach

an-sunī kartā nahīñ us ko sunā kar dekhnā
hausla rakh kar ḳhudā ko sach batā kar dekhnā

sach hai ham girya-kunāñ kuchh bhī nahīñ kar sakte
regzāroñ ko samundar to banā sakte haiñ

is darja jhuuT suntā rahā huuñ tamām umr
sunñe kī sach bhī ab koī aadat nahīñ mujhe

vahīñ pe sach kā mujhe tarjumān honā thā
qadam qadam pe jahāñ imtihān honā thā

anjām ḳhushī kā duniyā meñ sach kahte ho ġham hotā hai
sābit hai gul aur shabnam se jo hañstā hai vo rotā hai

ek hī sach ne hameñ aisā kiyā sar-afrāz
barsar-e-dār haiñ aur is se ziyāda kyā hoñ

vo sach se ḳhush na agar ho to jhuuT boleñge
ki vo jo rūThe to apnā guzāra kyūñkar ho

us kī āñkhoñ meñ bulāvā hī na thā sach ye hai
ai shab-e-hijr tujhe saath kiyā thā kis ne

sach to ye hai qusūr apnā hai
chāñd ko chhūne kī tamannā kī

sach ye hai ham hī mohabbat kā sabaq paḌh na sake
varna an-paḌh to na the ham ko paḌhāne vaale

jhuuT ke paañv nahīñ hote ik roz to pakaḌ jā.egā
sach ke haath kabhī nahīñ aanā tum hī kaho kyā mumkin hai

sune vo aur phir kar le yaqīñ bhī
baḌī tarkīb se sach boltā huuñ

jhuuT kā Dañkā bajtā thā jis vaqt 'jamīl' is nagrī meñ
har raste har moḌ pe ham ne sach ke alam lahrā.e haiñ

sachchā.ī hai amrit dhārā sachchā.ī anmol sahārā
sach ke raste chal ke sab ne Thor Thikāne paa.e haiñ

sāmne sach ke karbalā-o-damishq
kalima-e-haq pe aur sila kaisā

kāñTe bone vaale sach-much tū bhī kitnā bholā hai
jaise raahī ruk jā.eñge tere kāñTe bone se

sach pe hī sābit-qadam Thahrī thī maiñ
aur jhūTī baat par rūThī thī maiñ

maiñ tanhā hī nahīñ jo be-sabab sach bol dete haiñ
ye bīmārī ġharīboñ kī har ik bastī se niklegī

zindagī jab se shanāsā-e-muhāllāt huī
sach to ye hai ki ḳhud apne se mulāqāt huī

jhuuT sach meñ koī pahchān kare bhī kaise
jo haqīqat kā hī meyār fasāna Thahrā