Tags-Sach

bair duniyā se qabīle se laḌā.ī lete
ek sach ke liye kis kis se burā.ī lete

sach to kah duuñ magar is daur ke insānoñ ko
baat jo dil se nikaltī hai burī lagtī hai

tum pūchhte ho tum ne shikāyat bhī kī kabhī
sach pūchhiye to mujh ko shikāyat yahī to hai

ham to bas bolne vaale the sabhī kuchh sach sach
tum ne achchhā hī kiyā chup kā ishāra kar ke

nashshe kā ye aalam hai sach hī sach lage sab kuchh
zindagī kī sahbā hai mai-kada hai ḳhvāboñ kā

fasāne yuuñ mohabbat ke sach haiñ par kuchh kuchh
baḌhā bhī dete haiñ ham zeb-e-dāstāñ ke liye

ham husn ba-andāz-e-hasīñ dekhne vaale
sach baat hai tujh sā koī paikar nahīñ dekhā

muntashir jis ne kiyā thā un kī zulf-e-nāz ko
sach agar pūchho to vo bād-e-sabā thī maiñ na thā

sach to ye hai ki haath na aanā kamāl hai
duniyā se khel āñkh-micholī hī kyuuñ na ho

maiñ bhī sach kahtā huuñ is jurm meñ duniyā vaalo
mere hāthoñ meñ bhī ik zahr kā piyāla de do

bas isī soch se jhuuT qaa.em rahā
bol kar sach bhalā ham bure kyuuñ baneñ

jab tak vo jhuuT kahtā rahā sar pe taaj thā
sach kah diyā to taaj hī kyā sar nahīñ milā

saaqī nazar na aa.e to gardan jhukā ke dekh
shīshe meñ māhtāb hai sach boltā huuñ maiñ

maslahat-ḳhū kab huā hai aa.ina
sach hī sach bas boltā hai aa.ina

bechtā hai sach bhare bāzār meñ vo
zahar pī kar naam karnā chāhtā hai

bichhaḌ gayā hai to ab us se kuchh gilā bhī nahīñ
ki sach to ye hai vo ik shaḳhs merā thā bhī nahīñ

ye haiñ na.e logoñ ke ghar sach hai ab un ko kyā ḳhabar
dil bhī kisī kā naam thā ġham bhī kisī kī zaat thī

peḌ the saa.e the pagDanDī thī ik jaatī huī
kyā ye sab kuchh ḳhvāb thā sach-much yahāñ aisā na thā

ye agar sach hai ki mujh ko ishq karnā aa gayā
to samajh lo roz jiinā roz marnā aa gayā

ai ġham-e-dahr terā kyā hogā
ye agar sach hai mar ga.e haiñ ham