Tags-Sadgi

ta.assub se ho paak har shaḳhs 'armān'
merī sādgī dekh kyā chāhtā huuñ

pūchhte haiñ ye shā.erī kyā hai
haa.e aisī bhī sādgī kyā hai

fazā-e-tīra kī uqda-kushā hai jo tanvīr
ḳhulūs-e-dil kī vo pur-kār sādgī hogī

ho gayā aaj se bas ilm-e-qiyāfa bātil
sādgī se ye khulā thā ki sitamgār nahīñ

haa.e kis sādgī se sīkhā hai
husn ne ehtimām-e-rānā.ī

haa.e vo qahr-e-sādgī-āmez
kaash ham phir unheñ ḳhafā karte

ye sādgī ye najābat jo aib haiñ mere
sunā thā in pe to nasleñ guzārā kartī haiñ

vo mirī sādgī pe martā hai
mujh ko gahnoñ kī kyā zarūrat hai

na shoḳhī shoḳh hai itnī na purkār itnī purkārī
na jaane log terī sādgī ko kyā samajhte haiñ

tā-umr zindagī ko nibhānā muhāl hai
kuchh roz sādgī kī adā.eñ nibhā.ūñ maiñ

sādgī ko bhī jis pe rashk aa.e
is takalluf kī intihā huuñ maiñ

tujh ko zebinda hai kyā sādgī aur rañgīnī
ek trahdār hai tū laakh tarah-dāroñ meñ

dil ko uljhā na yuuñ savāloñ meñ
ye tirī sādgī samajhtā hai

saḳht jān-levā hai sādgī mohabbat kī
zahr kī kasauTī par zindagī ko kastī hai

masarratoñ ke husūl kā hai jahāñ meñ bas ik yahī tarīqa
ki sādgī se nibāh kar lo talab ke jin ko ġhulām kar ke

mirī rāhoñ meñ jitne pech-o-ḳham haiñ
ye sab baḳhshe haiñ terī sādgī ne

kitne anjān haiñ kyā sādgī se pūchhte haiñ
kahiye kyā merī kisī baat pe ronā aayā

jāntā huuñ maiñ us kī sādgī-o-māsūmī
vo mirā kabūtar bhī haath se uḌā degā

ḳhud ko tamāshā ḳhuub banātā rahā huuñ maiñ
qīmat bhī sādgī kī chukātā rahā huuñ maiñ