Tags-Sadgi

had-e-adab se gurezāñ na ho sakā koī
ki sādgī meñ tirā bāñkpan hī aisā thā

tire ishq kī intihā chāhtā huuñ
mirī sādgī dekh kyā chāhtā huuñ

sādgī kī apsarā vo yā hai koī sāhirī
hai ġhazal yā hai vo sandal shoḳh chanchal kaun hai

jamāl aur junūñ ho chuke zamāna-shanās
niyāz-o-nāz meñ kahne ko sādgī hai vahī

sunā rahā huuñ baḌī sādgī se pyaar ke giit
magar yahāñ to ibādat bhī kārobārī hai

ahl-e-dānish dekheñ un kī sādgī bechārgī
jo vasīloñ ke bharose par ḳhatā karte rahe

faqat tumhīñ ko nahīñ apnī sādgī pe ġhurūr
dimāġh arsh pe rahte haiñ ḳhāksār ke bhī

ḳhasāre meñ rahe lekin na chhoḌī sādgī ham ne
ba-har-sūrat nibhā.ī dushmanoñ se dostī ham ne

qamīzoñ se baazū alag ho chuke haiñ
ġharāra bhī patlūn hai sādgī meñ

din bhī hai raat bhī hai mere saath
tarah meñ sādgī hai mere saath

aa chalā us but-e-ayyār kī bātoñ kā yaqīñ
sādgī apnī qayāmat hai ḳhudā ḳhair kare

vo sādgī meñ bhī hai ajab dilkashī liye
is vāste ham us kī tamannā meñ jī liye

hājat nahīñ banāo kī ai nāznīñ tujhe
zevar hai sādgī tire ruḳhsār ke liye

vo dāstāñ jo tirī dilkashī ne chheḌī thī
hazār baar mirī sādgī ne dohrā.ī

maiñ dekhtī thī tire ḳhāl-o-ḳhad ko hairat se
magar ye kyā ki mirī sādgī ne kuchh na diyā

mirī sādgī ke ḳhulūs ne tujhe baḳhsh dī vo barahnagī
jo nafas nafas kī hai tishnagī jo nazar nazar kī pukār hai

jaltā-bujhtā ye kirmak-e-shab-tāb
us ko pur-kār-e-sādgī kahiye

paikar hai vo ek sādgī kā
sau rañg haiñ us kī sādgī meñ

kitne anjān haiñ kyā sādgī se pūchhte haiñ
kahiye kyā merī kisī baat pe ronā aayā

sādgī meñ hazār purkārī
bāñkpan meñ chhupā huā kyā hai