Tags-Sadgi

magar itnī sādgī bhī to bajā.e ḳhud adā hai
ba-ḳhayāl-e-parda-dārī ba-jamāl-e-āftābī

bhuul jaatā huuñ maiñ sitam us ke
vo kuchh is sādgī se miltā hai

faqat ik sādgī par shoḳhiyoñ ke haiñ gumāñ kyā kyā
nigāh-e-sharmagīñ se hai nihāñ kyā kyā ayaañ kyā kyā

ġhazab kā husn sahī terī sādgī meñ magar
pasand haiñ mujhe ai dost shoḳhiyāñ bhī bahut

jo sādgī hai kuhan meñ hamāre ai 'nīraj'
kisī pe aur bhī kyā aisā bāñkpan dekhā

is sādgi-e-husn meñ kis darja kashish hai
har naaz meñ ik jazba-e-ġhammāz kā aalam

banāvaT ho to aisī ho ki jis se sādgī Tapke
ziyāda ho to aslī husn chhup jaatā hai zevar se

nazar nīchī ye māthe kī matānat
maiñ qurbāñ aap kī us sādgī ke

bāñkpan meñ aur koī shai nahīñ
sādgī kī intihā maujūd hai

baġhair us se mile us ke ghar se lauTī huuñ
kahāñ ga.ī thī mujhe le ke sādgī merī

kyā jaane kitne fitne uThte haiñ kaj-ravī se
vo shaḳhs yuuñ ba-zāhir miltā hai sādgī se

'farhat-ehsās' aa gayā kyā bazm meñ
sādgī aa.ī hai hoshyāroñ ke beach

ālam-e-husn-e-sādgī tauba
ishq khā khā ke pech-o-tāb uThā

ye sādgī jo rañgīn bhī hai ye ḳhāmushī jo taqrīr bhī hai
vo ek tarah se lagte haiñ tahrīr meñ bhī tasvīr meñ bhī

shoḳhī-e-husn-e-be-amāñ kī qasam
husn kī sādgī nahīñ jaatī

saḳht jān-levā hai sādgī mohabbat kī
zahr kī kasauTī par zindagī ko kastī hai

ye sādgī hai ki dil chāhtā hai yuuñ bhī ho
kabhī zamīñ pe raheñ aur kabhī qamar meñ raheñ

TuuTe hue diloñ ko joḌe rafūgarī se
joḌe tamām girheñ jazboñ kī sādgī se

maiñ aur us ġhuncha-dahan kī aarzū
aarzū kī sādgī thī maiñ na thā

sādgī kā huuñ us kī dīvāna
abhī jis ko sañvar nahīñ aatā