Tags-Safar

zindagī tanhā safar par gāmzan hotī huī
aur ham yādoñ ko pichhlī ham-qadam karte hue

dam liyā thā na qayāmat ne hanūz
phir tirā vaqt-e-safar yaad aayā

dam to lene do nakīrain thakā-māñda huuñ
ruḳh pe dekho to mire gard-e-safar hai ki nahīñ

shor kaisā apnī aahaT bhī na sun pāoge tum
is safar meñ aisā sannāTā to aksar aa.egā

zāt-dar-zāt ham-safar rah kar
ajnabī ajnabī ko bhuul gayā

use sadiyāñ lageñgī niiñd se bedār hone meñ
abhī āġhāz kā mausam hai añgḌā.ī safar meñ hai

azal se tā-abad hai kār-farmā gardish-e-daurāñ
ki nādānī hazar meñ aur dānā.ī safar meñ hai

kahāñ se aa.iiñ kānoñ ke liye rim-jhim sī āvāzeñ
jaras ik lafz-e-pārīna hai shahnā.ī safar meñ hai

ye bastī hai ki zindāñ kuchh bhī to palle nahīñ paḌtā
the kab pachhuā ke din aur kab se purvā.ī safar meñ hai

akele-pan kā 'azmī' ho bhī to ehsās kaise ho
tasalsul se hamārī shām-e-tanhā.ī safar meñ hai

ḳhabar bhī to nahīñ hai ab kidhar ko jā rahe haiñ ham
sarāboñ kā safar hai ābla-pā.ī safar meñ hai

koī aahaT banātī hī nahīñ ummīd kā mausam
kuchh aisī chup lagī hai jaise goyā.ī safar meñ hai

bagūle rahnumā haiñ bād-e-sahrā.ī safar meñ hai
rukeñ kaise hamāre saath rusvā.ī safar meñ hai

ab ijz-e-safar kī bhī malāmat hai mire sar
har raah mire sāmne āġhosh-kushā hai

na jaane kitnī hī samteñ bulā rahī haiñ mujhe
har ik qadam pe hai mujh ko nayā safar Thahrā

shurūa huā thā abhī aur qarīb ḳhatm hai ab
ye zindagī kā safar kitnā muḳhtasar Thahrā

na.ī rutoñ ke jhamele hoñ us kā zād-e-safar
shikast-e-arz-e-tamannā pe gungunā.ūñ maiñ

tū mirā sharīk-e-safar nahīñ mire dil se duur magar nahīñ
tirī mamlikat na rahī magar tirā iḳhtiyār nahīñ gayā

zindagī ek safar ḳhauf kī zanjīr ke saath
maut ik ḳhvāb-e-girāñ hashr kī ta.abīr ke saath

koī sabīl ki pyāse panāh māñgte haiñ
safar kī raah meñ parchhā.iyāñ bichhāyā kar