Tags-Safar

terī nazar sarāb par mujh ko aziiz gard-e-rāh
tū merā ham-safar nahīñ to merā haath chhoḌ de

rañgoñ ke qāfile nahīñ ab mere ham-safar
hamrāh ek barg-e-azzā-dār aa.egā

musāhiboñ kī tarah har qadam pe ḳhaar mile
mirā safar to baḌe ehtimām kā niklā

silsila raushan tajassus kā udhar merā bhī hai
ai sitāro us ḳhalā meñ ik safar merā bhī hai

saath chhūTegā nahīñ apnā safar meñ umr ke
rahguzar tū aur tirā rah-gīr ho jā.ūñgā maiñ

ai rāh-e-ishq ke raahī sun chal aise safar kī lazzat meñ
tirī āñkhoñ meñ na.e ḳhvāb to hoñ par ḳhvāboñ kī ta.abīr na ho

sab ne kāñToñ hī pe chal kar paa.ī hai manzil yahāñ
kāmyābī ke safar meñ to koī tanhā nahīñ

ibtidā phir se hai ek aur safar kī 'ātish'
ba.ad marne ke bhale pairoñ se juute nikle

vādī-e-ishq meñ na milā koī ham-safar
sunte the naam ḳhizr alaihis-salām kā

mire saath saath safar meñ hai mire ghar kī saarī hamāhamī
sar-e-gosh qahqahe ras-bhare sar-e-dosh phuul gulāb kā

mire asbāb meñ mashkīza-o-ḳhurjīn rakhnā
safar kī shaam hai aur regzār aane lagā hai

regzāroñ ke safar pe jo chale ho 'ālok'
koī āñkhoñ meñ liye ashk khaḌā hai sāhab

safar meñ chal rahā hai ḳhauf sā aapas meñ luTne kā
ye kaisī raah par huuñ maiñ ye kaise qāfile meñ huuñ

milā to de ke judā.ī chalā gayā āḳhir
hamāre hisse meñ tanhā safar rahā āḳhir

ham-safar aise vafādār kahāñ milte haiñ
tere vahshī ke qadam chhoḌ ke chhāle na ga.e

mujh ko manzil bhī na pahchān sakī
maiñ ki jab gard-e-safar se niklā

bāġh-e-bahisht se mujhe hukm-e-safar diyā thā kyuuñ
kār-e-jahāñ darāz hai ab mirā intizār kar