Tags-Safar

mire junūn ko pahuñchā diyā hai manzil tak
safar ke shauq ne ḳhāna-ḳharāb kar ke mujhe

shaam ne din kā saath chhuḌāyā raat ne dasht meñ aan liyā
aise safar meñ rahgīroñ par saañs bhī dūbhar hote haiñ

nazar meñ koī manzil hai na jaada chāhtā huuñ
safar chāhe koī ho be-irāda chāhtā huuñ

hue jaate haiñ kis liye āḳhir
ham-safar baat baat par ḳhāmosh

tā ye safar hayāt kā maqsad-e-zindagī bane
chāhiye markaz-e-nigāh gardish-e-pā ke saath saath

dil hameñ tum se lagānā hī na thā
ab safar baar hai kyā honā hai

jo ham-safar sar-e-manzil bichhaḌ rahā hai 'farāz'
ajab nahīñ hai agar yaad bhī na aa.uuñ use

raah meñ qadmoñ se jo lipTī safar kī dhuul thī
tum ne āñkhoñ meñ jagah dī ye tumhārī bhuul thī

aave vo agar yār-e-safar-karda to 'inshā'
maiñ dauḌ ke kis lutf se khulvā.ūñ qamar-bañd

vahī be-irāda safar sāmne
vahī manziloñ kā gumāñ har taraf

mujhe mālūm hai un kī duā.eñ saath chaltī haiñ
safar kī mushkiloñ ko haath malte maiñ ne dekhā hai

apnī majrūh nigāhoñ kā safar hai jaarī
justujū karb-e-masāfat kī davā māñge hai

muddatoñ ba.ad bhī jaarī hai azāboñ kā safar
qatra qatra tirī āñkhoñ se Tapaktā maiñ huuñ

safar-e-shab meñ to phir chāñd kī hamrāhī hai
kyā ajab ho kisī jañgal meñ saverā mujh ko

bāloñ meñ dhuul paañv meñ chhāle na the magar
phir bhī kuchh ek ranj-e-safar intizār thā

āḳhir 'shakeb' ḳhū-e-sitam us ne chhoḌ dī
zauq-e-safar ko dekh ke sahrā simaT gayā

shahr kī galiyāñ ghuum rahī haiñ mere qadam ke saath
aise safar meñ itnī thakan meñ kaise kaTegī raat

ab bhalā chhoḌ ke ghar kyā karte
shaam ke vaqt safar kyā karte

shahr kuchh chhūT ga.e gard-e-safar lipTī rahī
koī rūdād sunāne pe na pahuñchā āḳhir

mirā har tiir nishāne pe na pahuñchā āḳhir
dar-safar meñ bhī Thikāne pe na pahuñchā āḳhir