Tags-Safar

kitne dariyā the kināre kitne
manzileñ kitnī safar kitne the

ye kaun ā.ina-paikar yahāñ se guzrā hai
ki jis kī gard-e-safar par nazar phisaltī rahī

zindagī kī saḳht rāhoñ kā safar darpesh hai
kārvāñ-dar-kārvāñ hai pā-ba-jaulāñ aadmī

vo mire saath thā sahrā ho ki dariyā 'farruḳh'
us ke hote hue kyā lutf-e-safar aayā thā

mire saath chalne vaale tujhe kyā milā safar meñ
vahī dukh-bharī zamīñ hai vahī ġham kā āsmāñ hai

kaisā lamha thā ki ham tark-e-safar kar baiThe
ḳhvāb kam the na tire ġham kā asāsa kam thā

na rañj-e-hijrat thā aur na shauq-e-safar thā dil meñ
sab apne apne gunāh kā bojh Dho rahe the

shab-e-safar hai hatheliyoñ par bhañvar ugeñge
tumhāre ham-rāh ab kinārā nahīñ chalegā

us ne pahle ruup diyā phir rañg diyā phir izn diyā
bahr o bar meñ barg o samar meñ na.e safar par niklā meñ

kahīñ rukeñge to tāriq-'na.īm' dekheñge
safar meñ kyā koī zād-e-safar banāyā jaa.e

ye kyā hazar ki safar kī zarūrateñ hī na hoñ
ye kyā safar ki kahīñ par sarāb aa.e nahīñ

aalam meñ āb-o-gil ke kyūñkar nibāh hogā
asbāb gir paḌā hai saarā mirā safar meñ

ḳhayāl aayā ravāna hue safar ke liye
na ham ne raḳht hī bāñdhā na āb-o-dāna liyā

vo kaun hai jo musāfir ke saath chaltā hai
ḳhayāl-e-yār bhī jab ham-safar nahīñ rahtā

havā kī zad pe hamārā safar hai kitnī der
charāġh ham kisī shām-e-zavāl hī ke to haiñ

tā-kujā nāla-e-ġhurbat ki chalī bād-e-shimāl
dil meñ phir zamzama-e-azm-e-safar taaza kareñ

ye kitāboñ ye risāloñ kā safar kuchh bhī nahīñ
isti.āra hī bahut hai tirī peshānī kā

zamīñ munqalib āsmāñ charḳh-zan
iqāmat bhī ham ko safar ho ga.ī

gale lagāte haiñ un ko bahāne ruḳhsat ke
chale sharāb ki ab ham-safar nahīñ jaate

ye tez dhuup ye sahrāoñ kā safar 'ruḳhsār'
yahī tapish hai jo kundan banā rahī hai mujhe