Tags-Safar

safar to kaT jā.egā magar kyā safar kaTegā
so apne hamrāh chand phūloñ kī baas kar luuñ

jabīñ tar ḳhushk-lab talvoñ meñ chhāle
yahī rūdād hai apne safar kī

vo sard raat jabki safar kar rahā thā maiñ
rañgīniyoñ se zarf-e-nazar bhar rahā thā maiñ

āñkheñ haiñ ki zaḳhmī haiñ badan haiñ ki shikasta
āshob-e-safar huuñ mirī raftār to dekho

samundaroñ ke safar par hue ravāna jab
hamāre saath chalā misl-e-bādbāñ sūraj

mire shauq-e-sair-o-safar ko ab na.e ik jahāñ kī numūd kar
tire bahr o bar ko to rakh diyā hai kabhī kā maiñ ne khañgāl ke

'asġhar' ye safar shauq kā ab kaise kaTegā
jo ham ne tarāshā thā vo but TuuT gayā hai

manzil kī jinheñ dhun thī unheñ mil ga.ī manzil
jo baiTh rahe gard-e-safar dekh rahe haiñ

ḳhālī haath nikal ghar se
zād-e-safar hushyārī rakh

thake hausle be-sadā rāste
tabāhī kā lambā safar har taraf

ye safar paañv hilāne kā nahīñ aañkh kā hai
maiñ ne is baab meñ rukne ko masāfat likkhā

dosto raah meñ manzil ke nishāñ bhī dekho
chalte chalte na phir āġhāz-e-safar aa jaa.e

haiñ saare qāfila-sālār sab haiñ rāh-numā
ye kyā safar hai jo koī kisī ke sañg nahīñ

har ek gaam pe āsūdgī khaḌī hogī
safar kī āḳhirī manzil bahut kaḌī hogī

safar bhī merā thā aur gard-bād mere the
vo ishq merā thā aur imtihāñ bhī mere the

is liye ab Dūbne ke ḳhauf se haiñ be-niyāz
ham ne āġhāz-e-safar dariyāoñ kī tah se kiyā

us se kahiyo ke lauT aa.e vo
mujh se tanhā safar nahīñ hotā

abhī jo bhī miltā hai taslīm kar lo
phir aage safar meñ na jaane ki kyā ho

na.e safar kā har ik moḌ bhī nayā thā magar
har ek moḌ pe koī sadā.eñ detā thā

shab-e-visāl bhī manzil hai mere zauq-e-safar
mujhe visāl se aage kī intihā.ī de