Tags-Safar

nuz.hat-e-shām ne jab raḳht-e-safar bāñdh liyā
dard ne ruuh ko bedārī kā paiġhām diyā

na thī zamīn meñ vus.at mirī nazar jaisī
badan thakā bhī nahīñ aur safar tamām huā

ye jo chaar din kī thī zindagī ise tere naam na kar sakā
mujhe rañj hai tire shahar meñ ye safar tamām na kar sakā

ek duniyā kā safar hai us ke mere darmiyāñ
fāsle hī fāsle haiñ nāptī rahtī huuñ maiñ

safar meñ dhuup kī shiddat kahāñ tak jheltā āḳhir
tirī yādoñ ko oḌhā aur saaya kar liyā maiñ ne

jamāl-e-dost ko mash.al banā liyā maiñ ne
vafā ki raḳht-e-safar hai mire safar ke liye

āgahī hai salīb jazboñ kī
zindagī hai safar azāboñ kā

nahīñ ye safar vāpsī kā nahīñ hai
use DhūñDne apne ghar jā rahā huuñ

azal vajūd safar rāste kī dhuñd adam
qusūr-vār huuñ tartīb-e-dāstāñ tak maiñ

zamīñ se chal ke to pahuñchā huuñ āsmāñ tak maiñ
safar kā bojh uThā.e phirūñ kahāñ tak maiñ

ye kis se kahiye ki 'tanvīr' ḳhud salīboñ ko
sukūn-e-jāñ ke liye ham-safar banātā hai

ik safar phir marī taqdīr huā jaatā hai
rāsta paañv kī zanjīr huā jaatā hai

maiñ vahshatoñ ke safar meñ bhī huuñ kahāñ tanhā
yahī gumāñ hai koī ās-pās rahtā hai

ek lamhe kā safar hai duniyā
aur phir vaqt Thahar jaatā hai

kar ke maiñ yaad dil apne ko bahut rotā huuñ
jab kisī shaḳhs kā duniyā se safar hotā hai

apnā pata na apnī ḳhabar chhoḌ jā.ūñgā
be-samtiyoñ kī gard-e-safar chhoḌ jā.ūñgā

jinheñ sab samajhte haiñ mehr o mah na hoñ sirf chand nuqūsh-e-pā
jise kahte haiñ kurra-e-zamīñ faqat ek sañg-e-safar na ho

mire pīchhe ye to muhāl hai ki zamāna garm-e-safar na ho
ki nahīñ mirā koī naqsh-e-pā jo charāġh-e-rāhguzar na ho

musāfir bhī safar meñ imtihāñ dene se Darte haiñ
mohabbat kyā kareñge vo jo jaañ dene se Darte haiñ

ek muddat se musalsal huuñ safar meñ lekin
manzil shauq hai do-gām yahī lagtā hai