Tags-Safar

bulāvā miTTī kā aayā thā saañs lene par
safar to yuuñ bhī mirā ḳhvāb hone vaalā thā

kal to jaanā hī hai safar pe mujhe
zindagī muntazir hai muñh phāḌe

masāfateñ kab gumān meñ thiiñ safar se aage
nikal ga.e apnī dhun meñ us ke nagar se aage

bā.is-e-rañj the ilzām kabhī
ab to ye raḳht-e-safar lagte haiñ

ab safar aur bhī dushvār huā ham-safaro
tīrgī raah kī zehnoñ meñ simaT aa.ī hai

mire junūn-e-qadam ne baḌā hī kaam kiyā
jo gard-e-rāh baḌhī kam huī safar kī dhuup

ham jo ik saath chale to 'yūsuf'
āsmāñ gard-e-safar meñ aayā

ḳhush aa gayā hai safar meñ jiinā isī liye to shakīl-'jāzib'
jahāñ se manzil qarīb dekhī vahīñ se vāpas palaT ga.e haiñ

din ko safar kuchh aur bhī āsān ho gayā
rātoñ ko sabz ḳhvāb ye kis ne dikhā diye

mujhe qarīb se dekho mujhe paḌho samjho
na.e safar na.e mausam kā qāfila huuñ maiñ

suḳhan safar meñ badan us ne khol rakkhe haiñ
zarā sā sāya-e-dīvār chāhtā huuñ maiñ

jise 'ruḳhsār' ab maiñ sah rahā huuñ
musalsal ik aziyyat hai safar na.iiñ

ye kis jānib safar tum kar rahe ho
ab āñkhoñ meñ umīdoñ kā nagar na.iiñ

añdherī shab diyā jugnū qamar na.iiñ
safar meñ ab koī bhī ham-safar na.iiñ

mire ḳhayāl meñ aao mirī nazar meñ phiro
ye ik tarah kā safar hai bhī aur hai bhī nahīñ

safar meñ tanhā qadam uThānā mushkil hai
saath tumhāre kabhī na thakne vaalā maiñ

havā ke saath safar iḳhtiyār karnā thā
dayār-e-shab ko ḳhamoshī se paar karnā thā

shajar se saaya judā hai to dhuup sūraj se
safar hayāt kā kis dasht-e-be-qayās meñ hai

manzil kī tamannā meñ sar-garm-e-safar haiñ sab
kaun us ke liye ro.e jo raah meñ chhūTā hai

na pūchho kaun haiñ kyuuñ raah meñ nā-chār baiThe haiñ
musāfir haiñ safar karne kī himmat haar baiThe haiñ