Tags-Sahra

na lī turbat ko gulshan meñ jagah lī bhī to sahrā meñ
riyāzat sab hamārī tū ne ai taqdīr miTTī kī

vo vahshī thā ki mar ke bhī na maidān-e-junūñ chhūTā
mirī mayyat rahī sahrā meñ dāman-gīr miTTī kī

dariyā ko khīñch laane de sahrā ke darmiyān
maTkā ġharīb-zādī kā pyāsā paḌā hai aaj

maiñ kuchh majnūñ nahīñ huuñ jo ki sahrā ko chalā jā.ūñ
tumhāre dar se sar phoḌūñgā saudā bhī agar hogā

vo mire ġham kā mudāvā nahīñ hone detā
zarra-e-dard ko sahrā nahīñ hone detā

ḳhvāb dar ḳhvāb bas ik chīḳhte sahrā kā sukūt
aur āñkhoñ meñ vahī diid kī ḳhū zinda hai

arz kiije jauhar-e-andesha kī garmī kahāñ
kuchh ḳhayāl aayā thā vahshat kā ki sahrā jal gayā

alfāz kisī saa.e meñ dam lene lage the
āvāz ke sahrā meñ abhī dhuup kaḌī thī

sahrā bhale ki zehan ko kuchh to sukūñ mile
ghabrā gayā huuñ shahar ke bāzār dekh kar

khule sahrā meñ mat DhūñDo hameñ tum
sadā se ham tumhāre darmiyāñ haiñ

kise batā.eñ ki ġham ke sahrā ko ḳhuld-dānish banāyā kaise
kahāñ se āb-e-ravāñ ko moḌā kahāñ se bād-e-bahār laa.e

vahī merī ḳhushī kā mas.ala hai
jo sahrā meñ namī kā mas.ala hai

maiñ khiñchā jaatā huuñ sahrā kī taraf
yuuñ to dariyā bhī bulātā hai mujhe

hamārī aag bhī taapī hameñ bujhā bhī diyā
jahāñ paḌāv kiyā thā ajiib sahrā thā

sahrā sahrā naam hai merā
meñ dariyāoñ kā shā.er huuñ

ḳhār-o-ḳhas-o-ḳhāshāk tasarruf meñ haiñ kis ke
ye apne hī dāman haiñ jo sahrā ne bhare haiñ

ai junūñ dekh isī sahrā meñ akelā huuñ maiñ
rahte jis dasht meñ haiñ ḳhauf-o-ḳhatar donoñ saath

hoñT pyāse rahe hausle thak ga.e umr sahrā huī
ham ne paanī ke dhoke meñ phir ret par kashtiyāñ Daal diiñ

ye ujaḌte hue jañgal ye ġhubār aur ye pyaas
log kahte haiñ kisī din yahāñ sahrā hogā

na koī aks na āvāz na chehrā hogā
duur tak ek jhulastā huā sahrā hogā