Tags-Sahra

har koī dil kī hathelī pe hai sahrā rakkhe
kis ko sairāb kare vo kise pyāsā rakkhe

na shahr biich mirā dil lage na sahrā meñ
kuchh āvatī nahīñ ai maah mujh siiñ ban tujh bin

ham se pūchhā kyā biitī hai āḳhir-e-shab ke māroñ par
sahrā sahrā rañg bikhere raqs kiyā añgāroñ par

yā terī aarzū mujhe le aa.ī is taraf
yā merā shauq raah meñ sahrā bichhā gayā

sahrā sahrā bārish hai
dhuup kidhar se lā.ūñ maiñ

pahle sahrā se mujhe laayā samundar kī taraf
naav par kāġhaz kī phir mujh ko savār us ne kiyā

jo kahtā hai ki dariyā dekh aayā
ġhalat mausam meñ sahrā dekh aayā

Dhalte haiñ yahāñ shīshe chalte haiñ yahāñ patthar
dīvāno Thahar jaao sahrā nahīñ bastī hai

maiñ nāla-e-sukūt sañg kā huuñ
sahrā ne bahut sunā hai mujh ko

ghaTā uThī thī kisī tishnagī ke sahrā se
jo qatra qatra samundar kī pyaas chhoḌ ga.ī

sahraa ke tab-o-taab kii baKHshish hai ki tuu hai
jhhaTkaarte phirte hai.n in aa.nkho.n se jo nam ham

sahrā sahrā chalte chalte kuchh aise mānūs hue
apne apne shahar kā raahī gosha gosha bhuul ga.e

thak ga.e haiñ mire nākām irādoñ ke qadam
ab nigāhoñ meñ koī shauq kā sahrā bhī nahīñ

jis kī ḳhushbū se mahak jaa.e shabistān-e-visāl
dosto tum ne kabhī vo gul-e-sahrā dekhā

kahāñ se laa.eñ ishq itnā ki us tak baar paa.eñ ham
vo ḳhud bairūn-e-sahrā ahl-e-vahshat se nahīñ miltā

maulā, phir mire sahrā se bin barse bādal lauT ga.e
ḳhair shikāyat koī nahīñ hai agle baras barsā denā

fart-e-vahshat meñ kahīñ aur nikal aayā huuñ
ghar kā rasta hai ki sahrā nahīñ dekhā jaatā

mujhe sitāroñ kī gardishoñ se Darā.egā kyā nasīb merā
ki maiñ bagūloñ ke saath sahrā meñ raqs kartā javāñ huā thā

maiñ to saaya huuñ ghaTāoñ se utarne vaalā
hai koī pyaas ke sahrā se guzarne vaalā

ḳhvāb muTThī meñ liye phirte haiñ sahrā sahrā
ham vahī log haiñ jo dhuup ke par kāTte haiñ