Tags-Sahra

sahrā to pyāse kā pyāsā
aur bhare dariyā par bārish

nahīñ bhūlegī merī dāstān-e-ishq-e-duniyā ko
ki sahrā meñ abhī tak naam letī hai jaras merā

qurbat kī lazzat jaise bārish meñ patthar rakkhā ho
andar sahrā jaisā mausam aur bāhar barsāteñ haiñ

mirī hai pyaas jo sahrā-ba-lab, sharar-ba-zabāñ
tumhārī aañkh hai gahre samundaroñ kī tarah

yuuñ to merā safar thā sahrā tak
pyaas le aa.ī mujh ko dariyā tak

sahrā meñ zarra qatra samundar meñ jā milā
maiñ ḳhaak meñ milā to milā tujh ko kyā milā

sahrā meñ ThanDe vaqt hameñ yaad aa.ī jo us kī jalvagarī
kuchh aisī huī vahshat dil ko dam jā ke zer-e-bām liyā

kyuuñ ta.ajjub hai mirī sahrā-navardī par tujhe
ye tagā-pū-e-damādam zindagī kī hai dalīl

kis liye sahrā ke muhtāj-e-tamāshā hojiye
chaak kiije siine ko aur aaphī sahrā hojiye

hāthoñ ko hai havā se garebāñ-darī hanūz
sahrā-talab haiñ mar ke bhī andar kafan ke paañv

jo giit chunte haiñ ḳhāmoshiyoñ ke sahrā se
vo lab-kushāoñ ko rāz-āshnā nahīñ kahte

daa.im sarāb ik mire andar hai kyā karūñ
sahrā mirī nazar meñ samundar hai kyā karūñ

hijratoñ ke sahrā kī
dil ne ḳhaak chhānī hai

havā ne ahl-e-sahrā ko ajab malbūs baḳhshā hai
saroñ par log pagḌī ke bajā.e gard rakhte haiñ

taktā rahtā huuñ sahrā se
ek harā gumbad hai dil meñ

to tai huā nā ki jab bhī likhnā rutoñ ke saare azaab likhnā
ujaaḌ mausam maiñ tapte sahrā ko aab likhnā habāb likhnā

ham aise jāda-tarāz-e-sahrā nikal hī aate haiñ chand āḳhir
suḳhan ko uslūb-e-zindagī kā diyā hai ham ne hī naam kahnā

kis dil se ham irāda-e-tark-e-junūñ kareñ
mumkin nahīñ ki ḳhvāhish-e-sahrā kā ḳhuuñ kareñ

chaaT lī kirnoñ ne mere jism kī saarī miThās
maiñ samundar thā vo sūraj mujh ko sahrā kar gayā

sahrā jañgal dasht na vīrānā koī
dīvāne kā ghar jaane kaisā hogā