Tags-Sahra

aañkh kī dahlīz se utrā to sahrā ho gayā
qatra-e-ḳhūñ pāniyoñ ke saath rusvā ho gayā

Thahre jo kahīñ aañkh tamāshā nazar aa.e
sūraj meñ dhuāñ chāñd meñ sahrā nazar aa.e

sau rañg ke dariyāoñ kā paanī hai nazar meñ
ab bādiya-paimā.ī-e-sahrā hai to kyā hai

maiñ aadam huuñ be-jāñ sā patthar nahīñ huuñ
bhañvar sā huuñ sahrā meñ pal pal uThūñgā

maiñ ik insāñ huuñ yā saarā jahāñ huuñ
bagūla hai ki sahrā jā rahā hai

kaisā vahshī hai ki vahshat kī hadeñ toḌ gayā
koī sahrā kī taraf jā ke bhī ghar aayā hai

ilāj-e-ġham-e-dil na sahrā na ghar
vahī hū kā aalam jidhar jā.iye

majnūñ ne kahā jaao vahshat unheñ dikhlāo
baiThā huā sahrā meñ be-kār jo maiñ royā

ye ishq kā jaltā huā sahrā hai ki maiñ huuñ
ye husn kā bahtā huā dariyā hai ki tum ho

lauT aa.e haiñ sahrā se sabhī lauTne vaale
is baar mire shahar meñ achchhā hai ki tum ho

sahrā koī bastī koī dariyā hai ki tum ho
sab kuchh mirī nazroñ kā tamāshā hai ki tum ho

tanhā.ī hai ġharībī hai sahrā hai ḳhaar hai
kaun āshnā-e-hāl hai kis ko pukāriye

ham ko bhī kabhī dekh havāoñ ke safar meñ
sahrā kī tarah naql-e-makānī kareñ ham bhī

'azm' udāsī kā ye sahrā yuuñ qadmoñ se lipTā hai
jalne vāloñ ko mil jaa.e jaise Thahar jaane kā ġham

ho ke barbād chale sehn-e-chaman se nik.hat
dasht-o-sahrā kī magar jholiyāñ bhartī jaa.e

ḳhabar milī ki mire vāste tū sahrā hai
maiñ terī yaad ke dariyā meñ bahne vaalā thā

charāġh-e-shahr se sham-e-dil-e-sahrā jalānā
aur us kī lau se mahfil-e-ḳhāna-e-duniyā jalānā

ġhazāl-e-husn ko ghar chāhiye par us ke liye
ḳhud apne aap ko sahrā banānā paḌtā hai

dar-ba-dar bhaTaktī hai dasht o shahr o sahrā meñ apnā sar paTaktī hai
ai havā-e-avāra terī hī tarah be-ghar be-amāñ to maiñ bhī huuñ

phuul gulshan ke nahīñ to ḳhāk-e-sahrā hī sahī
kuchh na kuchh to chāhiye taskīn-e-dāmāñ ke liye