Tags-Sahra

Dar Dar ke qadam yuuñ rakhtā huuñ ḳhvāboñ ke sahrā meñ jaise
ye reg abhī zanjīr banī ye chhāñv abhī dīvār huī

ye sahrā merā hai jhelam chanāb us kī taraf
turāb merī taraf aur aab us kī taraf

uḌaa.ī ḳhaak jis sahrā meñ tere vāste maiñ ne
thakā-māñda milā in manziloñ meñ āsmāñ mujh ko

sahrā thā yā chaman thā jaane vahī ki kyā thā
is dil kī intihā hai jo muddatoñ jalā thā

merī tanhā.ī na pūchho jaise koī naqsh-e-pā
duur sahrā ke kisī goshe meñ paayā jaa.e hai

barsoñ pahle bikhar ga.ī thī TuuT ke jo sahrā meñ
us laḌkī ke jism ke bikhre TukḌoñ ko chuntā huuñ

thā ajab kuchh sehr-sāmāñ ye bhī achraj ham ne dekhā
chhantā thā ḳhāk-e-sahrā aur motī roltā thā

ab ye masāfat kaise tai ho ai dil tū hī batā
kaTtī umr aur ghaTte fāsle phir bhī vahī sahrā

be-tere kyā vahshat ham ko, tujh bin kaisā sabr o sukūñ
tū hī apnā shahr hai jaanī tū hī apnā sahrā hai

ek sahrā hai mirī aañkh meñ hairānī kā
mere andar to magar shor hai tuġhyānī kā

sahrā kā safar thā to shajar kyuuñ nahīñ aayā
māñgī thiiñ duā.eñ to asar kyuuñ nahīñ aayā

yuuñ bhī dushvār hai āsūda-e-sahrā honā
aur jab ḳhaak bhī ho jaanā ho vahshat ke baġhair

maiñ ki sahrā-navard huuñ lekin
parvarish chāhtā huuñ phūloñ meñ

varna sahrā kī na yuuñ ḳhaak uḌaa.ī hotī
tū ne dekhe hī nahīñ saañp ḳhazāne vaale

agar dariyā kā muñh dekhūñ to qaid-e-naqsh-e-hairat huuñ
jo sahrā gher le to halqa-e-zanjīr ho paidā

vahshat meñ dil kitnā kushāda karnā paḌtā hai
in giilī āñkhoñ ko sahrā karnā paḌtā hai

vaqt-e-sahrā aur tañg huā hai
be-mai sab kirkirā mazā hai

'sāhir' ye merā dīda-e-giryāñ hai aur maiñ
sahrā meñ koī dūsrā jharnā to hai nahīñ

le chalī gar vahshat-e-dil jānib-e-sahrā 'vaqār'
ranj-o-hirmāñ paañv dar par yaar ke phailā.egā

mohabbat kī jahāñ barsī hai shabnam
diloñ ke ho ga.e sahrā samundar