Tags-Sahra

badan meñ ek sahrā jal rahā hai bujh rahā hai
mire dariyāoñ ko pahlā ishāra kaun degā

to kyā huā jo ab āñkhoñ meñ qaid hai sahrā
tire firāq meñ dariyā yahāñ se guzrā hai

sahrā kā musāfir huuñ maiñ ma.alūm hai tujh ko
kyoñ rakhtā hai tū shahr kā naqsha mire aage

maiñ ne jalte hue sahrā meñ tirā naam liyā
sā.ebāñ ḳhud hī chalā aaya hai saaya karne

josh-e-vahshat mere talvoñ ko ye iizā bhī sahī
haiñ jahāñ sau aable kuchh ḳhār-e-sahrā bhī sahī

bahut zarūrī hai sahrā meñ ishq zinda rahe
so is ko kyoñ na atā apne āb-o-gil kar duuñ

jī ḳhush huā dekhe se ki āzād fazā hai
bastī se guzartā huā sahrā meñ rukā maiñ

banjar dil sairāb to hogā ashkoñ se
sahrā āñkhoñ kaho nā kaise ro luuñ maiñ

yuuñ sahrā meñ saa.e kī tadbīr karūñ
piilī dhuup meñ aaj siyāhī gholūñ maiñ

sahrā se baar baar vatan kaun jā.egā
kyuuñ ai junūñ yahīñ na uThā lā.ūñ ghar ko maiñ

qalandaroñ ke liye shahr kyā hai sahrā kyā
ġharaz to Thor Thikānoñ se hai jahāñ ho jaa.eñ

vo mehrbāñ ho to sahrā bhī gulistāñ ho jaa.eñ
agar ḳhafā ho to barham sitār-gāñ ho jaa.eñ

ḳhaak chhānī jo fan ke sahrā kī
ham ne zauq-e-junūñ ko aam kiyā

tapte hue sahrā meñ jaise shabnam kī be-rañg numūd
jaane kitne ḳhat likkhe haiñ maiñ ne bhī barsāt ke naam

hasrat-o-armāñ bazm-e-tasavvur dāman-e-sahrā dast-e-junūñ
ḳhushiyoñ ke paiġhām haiñ 'ḳhālid' ġham ke hasīñ lamhāt ke naam

vahī to ek sahrā-āshnā thā qāfile meñ
vo jis ne aable ko ḳhaar par rakkhā huā thā

ham vo sahrā-navard haiñ jin kā
najd phailā hai āsmānoñ meñ

lāla-o-gul kī qasam azmat-e-sahrā kī qasam
abr-e-rahmat kā har ik shaḳhs tamannā.ī hai

havā-e-shahr tujhe raas hī nahīñ 'āsif'
misāl-e-qais tū sahrā meñ ḳhaak chhān kahīñ

idhar ye dil abhī tak hai asīr-e-vahshat-e-sahrā
udhar us aañkh ne chāroñ taraf pahra biThāyā hai