Tags-Sahra

hastī se mil gayā mujhe kuchh nīstī kā fahm
sahrā vahāñ milā jahāñ dariyā utar gayā

aarzū hai hameñ sahrā kī so haiñ bhī sairāb
ḳhushk ho jaa.eñ ham ik pal meñ jo jharnā chāheñ

is qadar ḳhud-rafta-e-sahrā hue
bhuul kar dekhā na mahmil ke qarīb

mere hoñToñ kā tabassum de gayā dhokā tujhe
tū ne mujh ko baaġh jaanā dekh le sahrā huuñ maiñ

samundar ho ki sahrā ho gul-o-gulzār ho chāhe
ye ham hī log haiñ jo har nagar ābād karte haiñ

jise maiñ vaqt ke sahrā meñ pheñk aayā huuñ
usī chaTān pe sadiyoñ kā haal raushan hai

jis taraf bhī dekhiye saaya nahīñ
phir bhī gulshan hai koī sahrā nahīñ

is raah se haT kar guzar ai nāqa-e-lailā
is gosha-e-sahrā meñ ham ārām-guzīñ haiñ

fitrat hai azal se pābandī kuchh qadr nahīñ āzādī kī
nazroñ meñ haiñ dilkash zanjīreñ ruḳh jānib-e-sahrā kaun kare

josh-e-junūñ se kuchh nazar aatā nahīñ 'asad'
sahrā hamārī aañkh meñ yak-musht-e-ḳhāk hai

bhaTak rahā huuñ abhī ḳhār-dār sahrā meñ
magar mizāj-e-gulistāñ se rū-shanās huuñ maiñ

maiñ ne paayā na ise shahr meñ na sahrā meñ
tū ne le jā ke mire dil ko kahāñ chhoḌ diyā

hai zarra zarra tañgi-e-jā se ġhubār-e-shauq
gar daam ye hai vus.at-e-sahrā shikār hai

ḳhaak hai merā badan ḳhaak hī us kā hogā
donoñ mil jaa.eñ to kyā zor kā sahrā hogā

ābād kījiye isī ghar meñ junūñ ko aap
is ghar meñ kyā nahīñ hai jo sahrā ko jā.iye

tamām umr bhaTakte rahe jo sahrā meñ
unheñ ye vahm ki vo rāsta dikhāte haiñ

āñdhī aa.e to andesha tūfāñ uTThe to tashvīsh
ek taraf se sahrā kā qurb ek taraf se dariyā kā

rāh-paimāyān-e-aqlīm-e-adam se yādgār
dāman-e-sahrā meñ ab baaqī nuqūsh-e-jāda haiñ

suune hī rahe hijr ke sahrā use kahnā
sūkhe na kabhī pyaar ke dariyā use kahnā

lekin banā na qais kī sūrat hamārā naam
sahrā kī ḳhaak ham ne bhī chhānī parat parat