Tags-Sahra

muddat ke ba.ad aa.e haiñ sahrā meñ ai junūñ
do aable to ḳhār-e-muġhīlāñ se duur hoñ

kyā sahrā kī taptī miTTī apnā sar na uThā.egī
tum to ye dīvār baḌhā kar sahrā tak le jāoge

bazm-e-ālam hai tavajjoh se usī ke ābād
shahr vīrāñ hai agar jānib-e-sahrā hai vo ruḳh

sar ko Takrā ke gayā hai koī sahrā kī taraf
ḳhuun sābit hai abhī shahr kī dīvāroñ se

saare dariyā haiñ yahāñ mauj meñ apnī apnī
mire sahrā ko nahīñ in se shikāyat koī

ġham-e-daurāñ kī kaḌī dhuup ye taptā sahrā
kaash do-gām tirī zulf ke saa.e hote

bisāt-e-ārzū tasvīr-e-sahrā ho ga.ī āḳhir
vo hañgāmoñ kī bastī ho kī duniyā ho ga.ī āḳhir

na DhūñDo 'mullā' ko kārvāñ meñ phiregā sahrā meñ vo akelā
kisī sabab se jo tā-ba-manzil na aa sakā kārvāñ se pahle

har zarra-e-ummīd se ḳhushbū nikal aa.e
tanhā.ī ke sahrā meñ agar tū nikal aa.e

dekh kar tujh nayan kī shoḳhī kuuñ
thak ke sahrā-nashīñ ġhazāl huā

kahīñ sahrā meñ bhī Das le na hameñ sairābī
ret ke batn se phunkārtā dariyā niklā

sach ke sahrā meñ unheñ DhūñD ke thak-hār ga.e
jhuuT ke shahr meñ yāroñ kā baserā niklā

hamāre qad kā tum andāza kyā lagāoge
ham aañkh muuñd ke sahrā meñ aab dekhte haiñ

haiñ apnī vahshateñ bhī bas ik ḳhvāb kā tilism
yaaro fusūn-e-vus.at-e-sahrā bhī ḳhvāb hai

kab tak is pyaas ke sahrā meñ jhulaste jaa.eñ
ab ye bādal jo uThe haiñ to baraste jaa.eñ

jā tujhe bhī kahīñ dīvār kā saaya na mile
ġham ke sahrā meñ mujhe chhoḌ ke jaane vaale

dhuul meñ lipTī is ḳhvāhish kī saarī parteñ kholeñ
dhartī jañgal sahrā parbat paañv biich piro leñ

sahrā kī ab havā jo lagī ho gayā hiran
majnūñ ke bas kā nāqa-e-lailā nahīñ rahā

jitne vahshī haiñ chale jaate haiñ sahrā kī taraf
koī jaatā hī nahīñ ḳhema-e-lailā kī taraf

yuuñ bhī sahrā se ham ko raġhbat hai
bas yahī be-gharoñ kī izzat hai