Tags-Sahra

reg-e-nafas kā zā.iqa muñh meñ gard-e-mah-o-sāl āñkhoñ meñ
maiñ huuñ 'zeb' aur chaar taraf ik sahrā hai ta.abīroñ kā

dil kī jannat ko sukūñ kuchh to mile
dasht-o-sahrā hī basā kar dekho

shahr sahrā hai ghar bayābāñ hai
dil kisī anjuman kā ḳhvāhāñ hai

ye jo sahrā meñ phirā kartā hai dīvāna sā
ḳhud ko duniyā ke jhameloñ se chhuḌā kar aayā

sair-e-lā-samtī se bhī lā-hāsilī kā lutf le
reg-e-sahrā be-sadā o be-samar hai bhī to kyā

āzmā.eñge ġham-e-hijr kā ik aur ilaaj
kar ke sahrā meñ kuchh ayyām basar ā.eñge

likhī thiiñ vahshateñ sahrā kī merī āñkhoñ meñ
kitāb-e-dil meñ varaq khul rahā thā jañgal kā

pyaar ke bādal to guzre the magar
dil ke sahrā meñ koī barsā na thā

niiñd ke sahrā meñ paanī kī tarah gum ho gayā
maiñ ne us ko ḳhvāb meñ har samt DhūñDā raat bhar

qadam qadam hai vīrāna kahīñ aur 'ḳhalish' ab kyā jaanā
varna shauq mujhe bhī kal thā sahrā kī paimā.ish kā

bulāvā aa gayā hai phir mujhe sahrā-navardī kā
yahī to zindagī ko ham-safar karne kā din hai

kabhī sarāb kabhī tishnagī kabhī sahrā
kabhī kabhī faqat āb-e-zulāl āñkhoñ meñ

josh-e-vahshat le chalā itnī na mohlat de mujhe
koh-o-sahrā ke azīzoñ se tū ruḳhsat māñgtā

tamām umr jhulastā rahā maiñ sahrā meñ
kahīñ shajar nazar aayā na sāya-dār mujhe

sar meñ saudā thā magar paañv meñ zanjīr na thī
ḳhaak uḌātā rahā mansūb na sahrā se huā

bastī koī ho to mil bhī jaa.e
sahrā meñ bhaTak rahā huuñ kab se

muddat ke baad aayā duniyā-e-dil meñ koī
sahrā huā hai jal-thal āñkhoñ meñ bhī namī hai

simaT ke aa gayā qadmoñ meñ kis tarah sahrā
sunā thā shor bahut us kī be-karānī kā

jis ko tai kar na sake aadmī sahrā hai vahī
aur āḳhir mire raste meñ bhī aayā hai vahī

shāyad ki is se murda samundar meñ jaan aa.e
sahrā meñ kashtiyoñ ko utārā karūñgā maiñ