Tags-Sahra

sahrā ke ishtirāk pe raazī the sab farīq
mahmil kā jo fasād thā ushshāq meñ rahā

aksar ġhazal huī hai kuchh aisī jāñ-kanī se
jaise ġhazāl dekhe sahrā meñ bebasī se

har shaam sisaktī huī fariyād kī vaadī
har sub.h sulagtā huā sahrā hai sadā kā

kaash ai abr-e-bahārī tire bahke se qadam
merī ummīd ke sahrā meñ bhī gaahe jaate

sochiye to sahrā hai Dūbiye to dariyā hai
ek din 'muhib' sāhab jis ke tah-nashīñ hoñge

gum-shuda rāstoñ kā pata haath meñ, biitī yādoñ kā basta liye saath meñ
maiñ ne sahrā ko apnā ta.āruf kiyā aur qalam apnā dast-e-hunar kar liyā

zuleḳhā ke vaqār-e-ishq ko sahrā se kyā nisbat
jo ḳhud khīñch kar na aa jaa.e use manzil nahīñ kahte

ab aur DhūñDiye koī jaulāñ-gah-e-junūñ
sahrā ba-qadr-e-vus.at-e-yak-gām ho gayā

qatra samjhe haqīqat-e-dariyā kyā
zarre ko ilm-e-vus.at-e-sahrā kyā

yaad sahrā kī hujūm-e-shahr meñ
zindagī kā ḳhvāb bīmāroñ ke beach

numū kī raushnī le kar ugā huuñ sahrā meñ
maiñ sabz ho nahīñ saktā huuñ ghaas ho kar bhī

vaañ rasā.ī hī nahīñ majnūn-e-sahrā-gard kī
ālam-e-imkāñ se bhī bāhar mirā vīrāna hai

koī vahshat se bhī milvā.e mujh ko
maiñ sahrā meñ abhī bilkul nayā huuñ

charāġh-e-shahr nahīñ ham charāġh-e-sahrā haiñ
kise ḳhabar ki jale aur kise ḳhabar na jale

haiñ uqda-kushā ye ḳhār-e-sahrā
kam kar gila-e-barhana-pā.ī

tishnagī ne kabhī dariyāoñ se milne na diyā
ham jidhar jaate usī raah meñ sahrā jaatā

har ek samt ḳhamoshī kā kufr chhāyā hai
hamārī zaat ke sahrā meñ de azaañ koī

sahrā kā koī phuul mo.attar to nahīñ thā
thā ek chhalāvā koī manzar to nahīñ thā

yaad kar dariyā ko sahrā ro paḌā
aur phir vo aap hī dariyā huā