Tags-Sahra

miltā nahīñ hai ahl-e-junūñ kā koī surāġh
bas ek naqsh-e-pā hai ki sahrā kaheñ jise

jis vaqt mahār uThā.ī thī merā uuñT bhī pyāsā thā
mashkīze meñ ḳhuun bharā thā aañkh meñ sahrā phailā thā

allāh re chashm-e-hosh kī kasrat-parastiyāñ
zarre hī rah ga.e koī sahrā nahīñ rahā

mirī vahshat pe sahrā tañg hotā jā rahā hai
kahā to thā ye āñgan lā-mahāla kam rahegā

bagūla ban ke uḌā ḳhvāhishoñ ke sahrā meñ
Thahar gayā to faqat thā ġhubār merī tarah

jilau meñ tishnagī āñkhoñ meñ sāhil
kahīñ siine meñ sahrā jā-guzīñ thā

kahīñ thā maiñ mujhe honā kahīñ thā
maiñ dariyā thā magar sahrā-nashīñ thā

gard phir vus.at-e-sahrā meñ simaT jaatī hai
rāsta kūcha o bāzār se jā miltā hai

ik tamannā ke liye phirtī hai sahrā sahrā
zindagī roz koī ḳhvāb nayā likhtī hai

sahrā se ho ke baaġh meñ aayā huuñ sair ko
hāthoñ meñ phuul haiñ mire paañv meñ ret hai

kahāñ ruke the vo kyā shajar the ki jin ke saa.e meñ ham khaḌe the
vo dhuup kaisī thī jis kī bārish se mere sahrā hare hue haiñ

ret sahrā nahīñ, ret dariyā nahīñ
ret bas ret hai

us ke dar se jo uThe shahr se phir kyā matlab
kisī sahrā meñ hī ab naql-e-makāñ Thahregī

vo āsmāñ ho ki sahrā vajūd ho ki adam
fazā banī hai ye kis sharh-e-ḳhāmushī ke liye

nashsha-e-sahrā-navardī meñ tujhe kab hosh thā
tujh ko shahr-e-gul kā ik ik ghar sadā detā rahā

maqsad-e-zīst ġham-e-ishq hai sahrā ho ki shahr
baiTh jā.eñge jahāñ chāho biThā do ham ko

sahrā se chale haiñ sū-e-gulshan
ḳhūnīñ-jigarān-e-chāk-dāman

sahrā kī būd-o-bāsh hai achchhī na kyuuñ lage
sūkhī huī gulāb kī Tahnī gilās meñ

kis ne sahrā meñ mire vāste rakkhī hai ye chhāñv
dhuup roke hai mirā chāhne vaalā kaisā

fazā sahrā kī āñkhoñ se jo dekheñ haiñ vo kah deñge
gul-e-ḳhud-rau kā aalam kam nahīñ gul-hā-e-gulshan se