Tags-Sahra

tum se kyā tum bhes badal kar baiTh raho hañsmukh chehroñ meñ
maiñ āñkhoñ meñ aañsū bhar kar sahrā sahrā ban ban DhūñDūñ

ishq ne phir hameñ ik baar hai baḳhshā sahrā
dariyā milnā bhī nahīñ abr barasnā bhī nahīñ

āvārgī kā Dar na koī Dūbne kā ḳhauf
sahrā hī ās-pās na dariyā yahīñ kahīñ

us kī bazm-e-gul haiñ apne ḳhāna-e-vīrāñ kī samt
maiñ misāl-e-abr aayā sūrat-e-sahrā gayā

rahūñ gulshan meñ yā sahrā meñ dīvāna hī kahtī hai
ye duniyā kaisī duniyā hai kahīñ jiine nahīñ detī

apnī palkoñ pe liye phirtā huuñ chāhat ke sarāb
dil ke sahrā ko samundar kā kināra na kahūñ

sahrā pe bādaloñ kā hunar khul nahīñ sakā
qatre banā.e the ki sharāre banā.e the

mere sahrā kī ziyārat ko hazāroñ pariyāñ
roz le le ke sulaimān ko razā.eñ aa.iiñ

kaun kisī kī suntā hai is bastī meñ
chīḳh tumhārī sahrā kā āvāza hai

duur talak taptā sahrā
aur ik chhāgal hai sāhab

jalte sahrā kā safar hai ye mohabbat jis meñ
koī bādal na kahīñ sāya-e-ashjār na jā

raah de dī tire bādal ko guzarne ke liye
varna ye dil to tirī pyaas se sahrā bhī huā

lahū jigar kā huā sarf-e-rañg-e-dast-e-hinā
jo saudā sar meñ thā sahrā khañgālne meñ gayā

jañgal to tai kar aa.e haiñ
aage ik sahrā paḌtā hai

muddat meñ idhar phir vo gul-bār nazar aa.e
sahrā meñ bahāroñ ke āsār nazar aa.e

mere afkār pe ehsās kā sahrā haavī
aur taḳhayyul meñ gulistāñ hai tumheñ kyā ma.alūm

kal dāman-e-sahrā meñ ham guzre jo vaqt-e-sub.h-dam
ik kāsa-e-sar par alam aayā nazar apne vahīñ

vo jo vīrān phirā kartā hai
us ke sar meñ koī sahrā hogā

dasht-o-sahrā meñ samundar meñ safar hai merā
rañg phailā huā tā-hadd-e-nazar hai merā